Ukraina prezidenti Vladimir Zelenskiy da’vo qilishicha, u yaqinda Rossiyaga “preventiv zarba” berish haqida gapirganida harbiy choralarni emas, sanksiyalarni nazarda tutgan. Bu haqda u BBC nashriga bergan intervyusida ma’lum qildi.
“Men ‘preventiv zarba’ deganim ingliz tilida preventive kick bo‘ladi, attack emas. Bu boshqa-boshqa narsalar. Shuning uchun ham inglizcha yoki ukraincha gapirayotganingizda, u maksimal darajada to‘g‘ri tarjima qilinishi muhimdir, chunki rossiyaliklar undan har doim hozirgidek foydalanadi”, — dedi Zelenskiy.
Ukraina prezidenti aytishicha, Rossiya Ukrainaga bostirib kirishidan avvalroq u “preventiv zarbalar, sanksiyaviy zarbalar mavzusi”ni ko‘targan. 24-fevraldan keyin, dedi u, “Yevropa jamiyati, avvalo Britaniya” Rossiya urush boshlashga qo‘rqishi uchun “o‘zlari ishtirok etishi, sanksiyalar kiritishi, preventiv zarbalar berishi kerak bo‘lgani”ni tan olgan.
“Endi esa — ular yadro quroli haqida nosog‘lom g‘oyalarini aytayotgan bir paytda, men ularga o‘zlarining jamiyati bilan bu haqda gaplashishlariga yo‘l qo‘ymang, deyapman. Ular o‘z jamiyatini tayyorlashni boshlamoqda. Bu juda xavfli… Ular undan foydalaniladimi, yo‘qmi — bilmaydi. Menimcha, bu haqda gapirish ham xavfli. Shuning uchun ham men preventiv hujum emas, zarba berishingiz kerak deb aytdim. Mana shuni nazarda tutgandim.
Rossiyaliklar esa bu so‘zlarni o‘zlariga qulay qilib tarjima qildi va hamma joyda takrorlay boshladi. Men esa sanksiyalarni ko‘zda tutgandim. Agar ular “yadro quroli” haqida gapirgan bo‘lsa, hatto bu haqda o‘ylagan bo‘lsa ham — siz ularni kiritishingiz kerak. Sizda yadroviy sanksiyalar paketi bor, Yevropada ularni joriy qilish imkoniyati mavjud — masalan, ular bizning AESni egallab olganiga javoban. Bu juda xavfli. Mana men nimani nazarda tutyapman”, — dedi Ukraina prezidenti.
Zelenskiy nima degandi?
6-oktabr kuni kechqurun Ukraina prezidenti Avstraliyaning siyosiy va iqtisodiy tadqiqotlar bilan shug‘ullanuvchi Loui instituti tadbirida videoaloqa orqali so‘zlagan nutqi katta shov-shuvga sabab bo‘ldi. “NATO nima qilishi kerak? Rossiyaning yadro qurolidan foydalanish ehtimolini yo‘q qilish lozim. Lekin eng muhimi, xuddi 24-fevralgacha bo‘lgani kabi men yana bir bor xalqaro hamjamiyatga murojaat qilaman: agar yadro quroldan foydalanilsa, ularning taqdiri nima bo‘lishini bilishlari uchun oldindan zarba berish kerak. Rossiyaning yadroviy zarbalarini kutib, ulardan keyin zarba bergandan foyda yo‘q”, — dedi Zelenskiy.Zelenskiy preventiv yadro zarbasini nazarda tutayotgani yoki gap oddiy qurol haqida ketayotganiga aniqlik kiritmadi. Biroq Rossiya hukumati vakillari uning bayonotini aynan yadro qurolini qo‘llashga da’vat deb qabul qildi. Xususan, Rossiya prezidenti matbuot kotibi Dmitriy Peskov Ukraina prezidentining nutqini “oldindan aytib bo‘lmaydigan dahshatli oqibatlarga olib keluvchi jahon urushini boshlashga da’vat” deb atadi.
Keyinroq Ukraina prezidentining matbuot kotibi ma’lum qilishicha, Vladimir Zelenskiy NATOni Rossiya tomonidan yadro quroli qo‘llanilishiga yo‘l qo‘ymaslik uchun unga preventiv zarba berishga chaqirmagan.
Ukraina prezidenti matbuot kotibining so‘zlariga ko‘ra, Zelenskiy preventiv choralarni 24-fevralgacha qo‘llash kerak bo‘lgani haqida gapirgan, “Rossiya urush boshlashiga yo‘l qo‘ymaslik uchun” “preventiv sanksiyalar” bilan cheklanib qolish kerak bo‘lmagani haqida aytgan.
Izoh (0)