Pentagon Rossiya tomonidan yadro qurolini qo‘llashga tayyorgarlik ko‘rilayotganiga oid belgilar yo‘q deb hisoblaydi. Bu haqda Pentagon spikeri general Pet Rayder brifing chog‘ida ma’lum qildi.
“Prezident Putin ayni paytda yadro qurolini qo‘llashga qaror qilgan, deb o‘ylamaymiz. Hukumatimizdagi va xalqaro hamjamiyatdagi ko‘plab odamlar, shu jumladan, mudofaa vaziri Lloyd Ostin ta’kidlab o‘tganidek, yadro quroli bilan qilinayotgan tahdidlar tentaklik va mas’uliyatsizlikdir”, — dedi Pentagon vakili.
Rayder qo‘shimcha qilishicha, shu bilan birga AQSH Rossiya tahdidlariga “juda jiddiy” munosabatda bo‘lishda davom etmoqda va vaziyatni kuzatmoqda.
Avvalroq AQSH prezidenti Jo Bayden Vladimir Putin Ukrainada taktik yadro qurolidan foydalanish ehtimoli haqida gapirganda “hazillashmayotgani”ni aytgandi.
Rossiya tomoni Ukrainada yadro qurolini qo‘llash ehtimolini ko‘p marta rad etib kelgan. Keyinroq, sentabrda, qisman safarbarlik haqida e’lon qilayotib, Putin G‘arb mamlakatlari “Kiyevni harbiy harakatlarni Rossiya hududiga ko‘chirib o‘tkazishga turtki berayotgani”ni va o‘yinga “yadroviy shantaj”ni qo‘shayotgani aytgandi. U xavf yuzaga kelgan taqdirda Moskva o‘zida bor vositalarni qo‘llashiga va’da berdi. Keyinroq Putin AQSH Yaponiyada yadro qurolini ishlatib, “pretsedent yaratgani”ni aytdi.
Oktabr boshida esa Checheniston rahbari Ramzan Qodirov Ukrainadagi harbiy operatsiya doirasida “kam quvvatli yadro quroligacha bo‘lgan” yanada keskinroq choralarni qo‘llash kerakligi haqida yozdi.
NATO bosh kotibi Yens Stoltenberg yadro quroli qo‘llanilishi Rossiya uchun jiddiy oqibatlarni keltirib chiqarishini ta’kidladi. Pentagon Moskva tomonidan yadro quroli bilan tahdid qilinishini qoralamoqda, ammo u bunday qurolni Ukrainada ishlatishi mumkinligidan darak beruvchi belgilarni hozircha ko‘rmayotganini aytmoqda.
Izoh (0)