Ўзбекистонда давлат идоралари, маҳаллий ҳокимият органларининг 3200 дан ортиқ рақобатга зид қарорлари бекор қилинди. Бу ҳақда АОКАда Монополияга қарши курашиш қўмитаси раиси ўринбосари Фаррух Қорабаев иштирокида ўтказилган брифингда маълум қилинди.
Қайд этилишича, 2021—2022 йиллар давомида давлат иштирокидаги корхоналарни ташкил этиш бўйича жами 45 та мурожаатнинг 33 фоизи қўмита томонидан рад этилган.
Давлат иштирокидаги корхоналарга асосий фаолиятидан хос бўлмаган қўшимча фаолият билан шуғулланиш ва бошқа корхоналарда улушга эга бўлишга тақиқ ўрнатилган. Натижада давлат иштирокидаги корхоналар сони сўнгги икки йилда қарийб 3000 дан 2100 тагача (30 фоизга) қисқарган.
Монопол корхоналар сони сўнгги 5 йилда 20 фоизга камайган ва бугунги кунда 90 тани ташкил этмоқда.
Ҳозирга қадар 1100 дан ортиқ норматив-ҳуқуқий ҳужжатлар лойиҳаларининг рақобатга таъсири баҳоланган, шундан қарийб 65 фоизида рақобатга зид нормалар мавжуд экани аниқланган.
Монополиялар, шу жумладан табиий монополияларнинг 6700 дан ортиқ турли рақобатга зид ҳаракатлари бартараф этилган. Натижада 42 мингга яқин тадбиркорнинг 554 миллиард сўмлик манфаатлари ҳимоя қилинган.
Изоҳ (0)