Marg‘ilon shahrida Ichki ishlar boshqarmasi xodimiga tan jarohati yetkazgan shaxsga jinoyat ishi qo‘zg‘atildi. Bu haqda “Daryo”ga viloyat IIB axborot xizmati ma’lum qildi.
Qayd etilishicha, 2022-yilning 4-avgust kuni Marg‘ilon shahar IIB profilaktika inspektori M.B. muqaddam tovlamachilik jinoyatini sodir etib, hozirda ozodlikni cheklash jazosini o‘tayotgan fuqaro Q.D.ning xonadoniga borgan. Mahkumning jazoni o‘tash talablariga rioya qilish holati o‘rganilganda Q.D.ning yashash xonadonida yo‘qligi aniqlangan.
Shundan so‘ng profilaktika inspektori unga nisbatan tegishli hujjatlarni rasmiylashtirayotgan vaqtda Q.D xonadoniga yetib kelgan. Ichki ishlar xodimining qonuniy faoliyatiga faol qarshilik ko‘rsatib, bir necha bor ogohlantirilishiga qaramasdan, unga tashlanib, tan jarohati yetkazgan.
Mazkur holat yuzasidan Marg‘ilon shahar prokuraturasi tomonidan Jinoyat kodeksining 219-moddasi 1-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan. To‘plangan hujjatlar jinoyat ishlari bo‘yicha Marg‘ilon shahar sudiga taqdim qilingan. Sudning 2022-yil 29-sentabrdagi hukmiga ko‘ra, Q.D.ga nisbatan 3 yil 1 oy muddatga ozodlikdan mahrum qilish jazosi tayinlangan.
Izoh (0)