Qrim ko‘prigining portlatilishi — Ukraina Xavfsizlik xizmati (UXX) operatsiyasi, deya xabar bermoqda “Ukrainskaya Pravda” huquq-tartibot organlaridagi manbasiga tayanib. UXX ko‘prikdagi portlash uchun javobgarlikni rasman zimmasiga olganicha yo‘q.
Shuningdek, Ukraina hukumati vakillari ham Ukraina harbiylari yoki maxsus xizmatlari aloqadorligini hozircha ma’lum qilgani yo‘q. Shu bilan birga, ular avvalroq Qrim ko‘prigini zarbalar berish uchun qonuniy nishon sifatida ko‘rayotganini bir necha marta ta’kidlagan.
Ukrainaning “Politika Strani” Telegram-kanali ham Ukraina maxsus operatsiyasini asosiy versiya deb atamoqda, biroq, go‘yoki, urushni kuchaytirishga intilayotgan “Kremldagi guruh” topshirig‘i bilan harakat qiluvchi Rossiya maxsus xizmatlari voqeaga aloqadorligi haqidagi konspirologik versiyani ham ilgari surmoqda.
Ukraina Mudofaa vazirligi Qrim ko‘prigidagi hodisa yuzasidan izoh berib, quyidagicha post qoldirdi: “‘Moskva’ raketa kreyseri va Kerch ko‘prigi — Ukraina Qrimida Rossiya hokimiyatining ikkita mashhur ramzi — yo‘qoldi. Ruslar, endi navbatda nima?”
Ta’kidlash joizki, aprel oyida “Moskva” kreyserining halokati, avgustda esa Qrimdagi harbiy aerodromning portlatilishi yuzasida javobgarlikni Ukraina Mudofaa vazirligi va UXX darhol rasman zimmasiga olmagandi. Shu bilan birga, ular Rossiya Qora dengiz floti flagmanining ishdan chiqarilishiga va Qrimdagi bazada Rossiya aviatexnikasi yo‘q qilinishiga aloqadorligini rad etmagan ham.
Ayni paytda Qrimda 50 ming nafargacha sayyohlar borligi aytilmoqda. Rossiya Transport vazirligi yaqin orada Kerch bo‘g‘ozi orqali parom qatnovi qayta yo‘lga qo‘yilishini ma’lum qildi.
Eslatib o‘tamiz, 8-oktabr kuni ertalab Qrim ko‘prigida yuk mashinasi portlab ketdi. Oqibatda ko‘prikning avtomobillar yuradigan qismida bir nechta tayanchlar oralig‘i qulab tushdi, shuningdek, ko‘prikdagi temir yo‘l orqali ketayotgan sisternali tarkib yonib ketdi. Hukumat hozircha ko‘prikning qancha vaqtda qayta tiklanishini ma’lum qilgani yo‘q. Rossiya Tergov qo‘mitasi hodisa yuzasidan jinoyat ishi qo‘zg‘atdi.
Kerch yarim orolini Taman yarim oroli bilan birlashtiruvchi Qrim ko‘prigi Rossiya va Yevropadagi eng uzun ko‘prik hisoblanadi — uning uzunligi 19 kilometrga teng. Ko‘prik qurilishi 2016-yil fevralida boshlanib, 2019-yil dekabrida to‘liq yakunlangan. Loyiha qiymati 220 milliard rubldan oshgan.
Ko‘prikning avtomobillar uchun mo‘ljallangan qismi 2018-yil mayidayoq ochilgandi. U orqali yo‘lovchi poyezdlar qatnovi esa 2019-yil 23-dekabrdan boshlandi. Muntazam temir yo‘l yuk qatnovi 2020-yil iyulida yo‘lga qo‘yildi.
Izoh (0)