Қрим кўпригининг портлатилиши — Украина Хавфсизлик хизмати (УХХ) операцияси, дея хабар бермоқда «Украинская Правда» ҳуқуқ-тартибот органларидаги манбасига таяниб. УХХ кўприкдаги портлаш учун жавобгарликни расман зиммасига олганича йўқ.
Шунингдек, Украина ҳукумати вакиллари ҳам Украина ҳарбийлари ёки махсус хизматлари алоқадорлигини ҳозирча маълум қилгани йўқ. Шу билан бирга, улар аввалроқ Қрим кўпригини зарбалар бериш учун қонуний нишон сифатида кўраётганини бир неча марта таъкидлаган.
Украинанинг «Политика Страни» Telegram-канали ҳам Украина махсус операциясини асосий версия деб атамоқда, бироқ, гўёки, урушни кучайтиришга интилаётган «Кремлдаги гуруҳ» топшириғи билан ҳаракат қилувчи Россия махсус хизматлари воқеага алоқадорлиги ҳақидаги конспирологик версияни ҳам илгари сурмоқда.
Украина Мудофаа вазирлиги Қрим кўпригидаги ҳодиса юзасидан изоҳ бериб, қуйидагича пост қолдирди: «‘Москва’ ракета крейсери ва Керч кўприги — Украина Қримида Россия ҳокимиятининг иккита машҳур рамзи — йўқолди. Руслар, энди навбатда нима?»
Таъкидлаш жоизки, апрель ойида «Москва» крейсерининг ҳалокати, августда эса Қримдаги ҳарбий аэродромнинг портлатилиши юзасида жавобгарликни Украина Мудофаа вазирлиги ва УХХ дарҳол расман зиммасига олмаганди. Шу билан бирга, улар Россия Қора денгиз флоти флагманининг ишдан чиқарилишига ва Қримдаги базада Россия авиатехникаси йўқ қилинишига алоқадорлигини рад этмаган ҳам.
Айни пайтда Қримда 50 минг нафаргача сайёҳлар борлиги айтилмоқда. Россия Транспорт вазирлиги яқин орада Керч бўғози орқали паром қатнови қайта йўлга қўйилишини маълум қилди.
Эслатиб ўтамиз, 8 октябрь куни эрталаб Қрим кўпригида юк машинаси портлаб кетди. Оқибатда кўприкнинг автомобиллар юрадиган қисмида бир нечта таянчлар оралиғи қулаб тушди, шунингдек, кўприкдаги темир йўл орқали кетаётган цистернали таркиб ёниб кетди. Ҳукумат ҳозирча кўприкнинг қанча вақтда қайта тикланишини маълум қилгани йўқ. Россия Тергов қўмитаси ҳодиса юзасидан жиноят иши қўзғатди.
Керч ярим оролини Таман ярим ороли билан бирлаштирувчи Қрим кўприги Россия ва Европадаги энг узун кўприк ҳисобланади — унинг узунлиги 19 километрга тенг. Кўприк қурилиши 2016 йил февралида бошланиб, 2019 йил декабрида тўлиқ якунланган. Лойиҳа қиймати 220 миллиард рублдан ошган.
Кўприкнинг автомобиллар учун мўлжалланган қисми 2018 йил майидаёқ очилганди. У орқали йўловчи поездлар қатнови эса 2019 йил 23 декабрдан бошланди. Мунтазам темир йўл юк қатнови 2020 йил июлида йўлга қўйилди.
Изоҳ (0)