“Yevrovideniye” qo‘shiqlar tanlovining yakuniy bosqichi 2023-yil 13-may kuni Buyuk Britaniyaning Liverpul shahrida bo‘lib o‘tadi. Bu haqda teleboshlovchi va aktyor Grem Norton BBC telekanali orqali ma’lum qildi.
Tanlovni o‘tkazish huquqiga da’vogarlar ro‘yxatiga dastlab Britaniyaning yettita shahri kirgandi (London ular orasida yo‘q edi). Sentabr oxirida Liverpul va Glazgo finalchi da’vogarlarga aylandi.
“Yevrovideniye-2023” dastlab Ukrainada o‘tkazilishi kerak edi, chunki 2022-yilda tanlovda Ukrainaning Kalush Orchestra guruhi g‘olib bo‘lgandi. Iyun oyida Yevropa uzatuv kengashi jangovar harakatlar tufayli tanlovni Ukraina shaharlaridan birida o‘tkazish mumkin emasligini e’lon qildi. “Yevrovideniye” o‘tkazish huquqi esa tanlovda ikkinchi o‘rinni olgan Buyuk Britaniyaga taqdim etildi.
Britaniya so‘nggi marta 1998-yilda “Yevrovideniye”ga mezbonlik qilgan edi, o‘shanda tanlov Birmingemda o‘tkazilgan. Londonda esa tanlov oxirgi marta 1977-yilda bo‘lib o‘tgan. 2023-yil tanlov mamlakat uchun to‘qqizinchisiga aylanadi.
“Yevrovideniye-2022” tanlovi Italiyaning Turin shahrida o‘tkazilgan edi. Unda Ukrainaning Kalush Orchestra guruhi Stefania qo‘shig‘i bilan g‘olib bo‘lgan, britaniyalik Sem Rayder esa Space man kompozitsiyasi bilan ikkinchi o‘rinni egallagandi. Rossiya Ukrainadagi vaziyat tufayli, bu yil tanlovdan chetlatilgandi.
Tanlov 1956-yildan buyon o‘tkazib kelinadi.
Izoh (0)