Yevroparlamentning shvetsiyalik deputati Abir Al-Sahloniy Eronda hukumatga qarshi namoyishlar o‘tkazayotgan ayollar bilan birdamlik belgisi sifatida minbarda turib, sochlarini qirqib tashladi. Bu haqda Der Spiegel xabar berdi.
“Eron erkin bo‘lmas ekan, bizning g‘azabimiz kuchayaveradi… Eronlik ayollar erkinlikka chiqmagunicha, biz ularning ortida turamiz”, — dedi Abir Al-Sahloniy Strasburgda Yevropa parlamenti majlisi chog‘ida minbarda nutq so‘zlayotib.
So‘ng u qo‘liga qaychi olib: “Ayollar, hayot, erkinlik”, — deya xitob qildi va sochlarini kesdi.
Al-Sahloniy Iroqda tug‘ilgan bo‘lib, Shvetsiyaning burjuaz-liberal Markaziy partiyasi vakilidir. U Yevropa parlamentida “Yevropani yangilash” guruhi a’zosi hisoblanadi.
Shuningdek, shou-biznes vakillari ham shunday aksiyalar o‘tkazib, Erondagi norozilik harakatlarini yoqlab chiqmoqda. Xususan, 50 ga yaqin fransuz aktrisalari va qo‘shiqchilari norozilik belgisi sifatida o‘z sochlarini qirqib tashlagan. Ular orasida mashhur aktrisalar Julyet Binosh, Izabel Yupper, Marion Kotiyyar, Jeyn Birkin, Sharlotta Gensbur va boshqalar bor.
Eronda hijob bilan bog‘liq namoyishlar bo‘lib o‘tmoqda
Eronda ommaviy noroziliklar sentabr o‘rtalaridan buyon davom etmoqda, ularga eronlik qiz Mahsa Aminiyning o‘limi sabab bo‘ldi. 22 yoshli qiz 13-sentabr kuni hijobni noto‘g‘ri o‘ragani uchun axloq politsiyasi tomonidan hibsga olingan. Shundan keyin u komaga tushib qolgan va bir necha kun o‘tgach, vafot etgan. Hukumat talqiniga ko‘ra, qiz politsiya uchastkasiga olib kelingan va u yerda yurak xurujini boshidan o‘tkazgan. Aminiyning qarindoshlari da’vo qilishicha, uning salomatligi bilan bog‘liq muammolari bo‘lmagan, ular tekshiruv o‘tkazilishini talab qilmoqda.
Axloq politsiyasi
Eron Islom Respublikasi Huquq-tartibot kuchlari Ibrat patruli (“axloq politsiyasi”) — Eron Ichki ishlar vazirligi nazorati ostidagi huquq-tartibot organi. 2005-yilda alohida tuzilma sifatida ajralib chiqqan. Ibrat patruli vazifalariga Eron fuqarolari va chet elliklarning jamoat joylarida shariat bo‘yicha munosib kiyinib yurishini ta’minlash kiradi.
Ayollarning boshini yopmay yurishi, ro‘mol yoki hijobni noto‘g‘ri taqishi, avratni yopmaydigan kiyim kiyishi, ba’zi hollarda esa “begona erkak bilan yaqindan muloqot qilishi” ularni hibsga olish uchun asos bo‘lib hisoblanadi.
Izoh (0)