Европарламентнинг швециялик депутати Абир Ал-Саҳлоний Эронда ҳукуматга қарши намойишлар ўтказаётган аёллар билан бирдамлик белгиси сифатида минбарда туриб, сочларини қирқиб ташлади. Бу ҳақда Der Spiegel хабар берди.
«Эрон эркин бўлмас экан, бизнинг ғазабимиз кучаяверади… Эронлик аёллар эркинликка чиқмагунича, биз уларнинг ортида турамиз», — деди Абир Ал-Саҳлоний Страсбургда Европа парламенти мажлиси чоғида минбарда нутқ сўзлаётиб.
Сўнг у қўлига қайчи олиб: «Аёллар, ҳаёт, эркинлик», — дея хитоб қилди ва сочларини кесди.
Ал-Саҳлоний Ироқда туғилган бўлиб, Швециянинг буржуаз-либерал Марказий партияси вакилидир. У Европа парламентида «Европани янгилаш» гуруҳи аъзоси ҳисобланади.
Шунингдек, шоу-бизнес вакиллари ҳам шундай акциялар ўтказиб, Эрондаги норозилик ҳаракатларини ёқлаб чиқмоқда. Хусусан, 50 га яқин француз актрисалари ва қўшиқчилари норозилик белгиси сифатида ўз сочларини қирқиб ташлаган. Улар орасида машҳур актрисалар Жулет Бинош, Изабел Юппер, Марион Котийяр, Жейн Birkin, Шарлотта Генсбур ва бошқалар бор.
Эронда ҳижоб билан боғлиқ намойишлар бўлиб ўтмоқда
Эронда оммавий норозиликлар сентябрь ўрталаридан буён давом этмоқда, уларга эронлик қиз Маҳса Аминийнинг ўлими сабаб бўлди. 22 ёшли қиз 13 сентябрь куни ҳижобни нотўғри ўрагани учун ахлоқ полицияси томонидан ҳибсга олинган. Шундан кейин у комага тушиб қолган ва бир неча кун ўтгач, вафот этган. Ҳукумат талқинига кўра, қиз полиция участкасига олиб келинган ва у ерда юрак хуружини бошидан ўтказган. Аминийнинг қариндошлари даъво қилишича, унинг саломатлиги билан боғлиқ муаммолари бўлмаган, улар текширув ўтказилишини талаб қилмоқда.
Ахлоқ полицияси
Эрон Ислом Республикаси Ҳуқуқ-тартибот кучлари Ибрат патрули («ахлоқ полицияси») — Эрон Ички ишлар вазирлиги назорати остидаги ҳуқуқ-тартибот органи. 2005 йилда алоҳида тузилма сифатида ажралиб чиққан. Ибрат патрули вазифаларига Эрон фуқаролари ва чет элликларнинг жамоат жойларида шариат бўйича муносиб кийиниб юришини таъминлаш киради.
Аёлларнинг бошини ёпмай юриши, рўмол ёки ҳижобни нотўғри тақиши, авратни ёпмайдиган кийим кийиши, баъзи ҳолларда эса «бегона эркак билан яқиндан мулоқот қилиши» уларни ҳибсга олиш учун асос бўлиб ҳисобланади.
Изоҳ (0)