“Rossiyani fojiadan, rus armiyasini bo‘lsa xo‘rlikdan qutqarish imkoningiz haliyam bor”. Ukraina Mudofaa vaziri rus harbiylarini zudlik bilan jangdan bosh tortishga chaqirdi (video)

Ukraina mudofaa vaziri Aleksiy Reznikov Rossiya armiyasining zobitlari va qo‘mondonligini “Rossiyani fojiadan, rus armiyasini bo‘lsa xo‘rlikdan qutqarishga” chaqirdi. Bu haqda u rus tilidagi 8 daqiqalik videomurojaatida gapirgan.

Vazirning so‘zlariga ko‘ra, Rossiya hukumati harbiylarini aldab, ularga xiyonat qilgan — endi bu askarlar Ukrainada halok bo‘lmoqda.

Sizga oson yurish va’da qilingan edi, lekin ular sizni tuzoqqa tushirdi. Birovning xomhayollari va yolg‘on maqsadlari uchun jon beryapsiz. Endi ular sizni tinglamaydi, chunki hozir sizni tinglash — xatolarini tan olishdir. Moskva esa haqiqatni yoqtirmaydi. Ularga go‘yoki NATO qo‘shinlari bilan jangda qanday qilib qahramonlarcha halok bo‘lganingiz haqida cho‘pchak aytish osonroq”, — dedi Reznikov.

Ukraina mudofaa vaziri o‘z nutqida mamlakat prezidenti Vladimir Zelenskiy frontga tez-tez borayotganini, Rossiya prezidenti Vladimir Putin esa “bunkerda yashirinib o‘tirganini” ta’kidladi.

Ukrainada hech kimni ozod qilmayotganingizni yaxshi bilasiz. Siz butun boshli shaharlarni yo‘q qilyapsiz, vaholanki yaqindagina ularni yaxshi qo‘shni deb bilardingiz, ular rus tilida gaplashardi. Endi esa avlodlar uchun adovat urug‘i sepildi. Haq ish uchun emas, balki o‘lim uchun yuborilganingizni o‘zingiz ham tushunib yetdingiz, — deya qo‘shimcha qildi Reznikov.

Buyog‘iga nima bo‘lishini aytaman. Minglab rus yigitlari o‘ladi. Undan ham ko‘prog‘i qo‘l-oyoqsiz qoladi. Lekin ular sharmanda bo‘ladi. Sizlarni aybdor qilishadi. Sizlarga yana xiyonat qilishadi, — dedi vazir.

Xulosa o‘rnida vazir jang qilishdan hoziroq bosh tortgan rus harbiylarining barchasiga Ukraina hayot, xavfsizlik va adolatni kafolatlashini aytdi.

Sizda haliyam Rossiyani fojiadan, rus armiyasini esa xo‘rlikdan qutqarish imkoni bor. Ammo vaqt tugayapti. Fursatni qo‘ldan bermang, — deya murojaatini tugatdi Reznikov.