O‘zbekistonda kuz-qish mavsumi oldidan suv tarmoqlarini sozlash ishlari qanday ketayotgani aytildi

O‘zbekistonda kuz-qish mavsumi uchun 1806,3 kilometr ichimlik suvi tarmoqlari va 1728 ta nasos uskunasi ta’mirlandi. Bu haqda AOKAda o‘tkazilgan brifingda “O‘zsuvta’minot” AJ axborot xizmati rahbari Akmal Murodov ma’lum qildi.

Qayd etilishicha, bu yilgi kuz-mavsumi uchun 40,8 milliard so‘m mablag‘ hisobidan jami 1815,3 kilometr ichimlik suvi tarmoqlari hamda 1689 ta nasos uskunasini joriy va mukammal ta’mirlash rejalashtirilgan. Hozirgi kunga kelib 1806,3 kilometr ichimlik suvi tarmoqlari va 1728 ta nasos uskunalari joriy ta’mirlandi.

Ichimlik suvi tarmoqlardagi avariya va nosozliklarni tezkorlik bilan bartaraf etish uchun hududiy suv ta’minoti korxonalaridagi jami 527 ta avariya tiklash brigadalarining barchasi shay holatga keltirildi. Barcha suv ta’minoti va kanalizatsiya xizmati ko‘rsatish korxonalari va inshootlari kuchaytirilgan ish rejimiga o‘tkazildi.

Yagona 12-55 qisqa raqamli Call-markazi hamda hududiy suv ta’minoti korxonalarining dispetcherlik xizmatlari 24/7 ish rejimiga o‘tkazildi.

Mavzuga doir: Kuz-qish mavsumiga tayyorgarlik uchun ajratilgan 2 trln so‘m qanday maqsadlarga yo‘naltirilgan?