“Qabulda Olmaliq va Ohangaron shahri, Ohangaron tumani hokimi ham bor, avval ularga murojaat qiling, hal bo‘lmasa menga keling” — Zoir Mirzayev (video)

Toshkent viloyati hokimi Zoir Mirzayev fuqarolar uchun bo‘lib o‘tayotgan navbatdagi qabulida fuqarolarga murojaat qilib, hamma o‘z hududi bo‘yicha mas’ullarga, xususan hokimlarga murojaat qilishi kerakligini, agar muammosi hudud hokimlari orqali hal bo‘lmasa keyin uning qabulida bo‘lishlari kerakligini aytdi.

Mana Olmaliq va Ohangaron shahri, Ohangaron tumani hokimi ham bor, avval ularga murojaat qiling, hal bo‘lmasa menga keling, — deydi Zoir Mirzayev uning qabulida navbatda turgan murojaatchilarga.

“Daryo” jurnalisti viloyat hokimining fuqarolarga mazkur murojaatidan so‘ng Angren shahar hokimi Alisher Rayimov bilan suhbatlashib, murojaatchilar nega ularning oldiga bormay, to‘g‘ridan to‘g‘ri viloyat hokimi qabuliga oshiqayotgani bilan qiziqdi.

Jurnalist Angren shahar hokimi Alisher Rayimovga yuzlanib, “Haqiqatan ham murojaatchilarga nega to‘g‘ri viloyat hokimi qabuliga oshiqmoqda? Ular sizlarga ishonmaganidan shunday qilyaptimi? Yoki bu fuqarolar muammosi viloyat darajasida hal etilishi kerakmi?”, — deya savol berdi.

Angren shahri hokimi bunga javoban “Fuqarolar bizning oldimizga ham kelib muammolarni aytyapti. Muammolarni hal qilyapmiz. Ammo baribir viloyat hokimi oldiga ham borishga qaror qilishadi. Bitta misol keltiraman, sizga, hozir mening qabulimda bo‘lgan fuqaro Durdona Xoljigitova ta’lim krediti olmoqchiligini aytib, murojaat qildi. Men unga yoshi 40 dan o‘tgani bois, ta’lim krediti emas, jamg‘armalar hisobidan kontraktiga yordam berishimni, shuningdek, hozirgi ishlayotgan joyida oylik maoshi kam bo‘lsa, Angren shahridagi mahallalarning birida xotin-qizlar faoli sifatida ishlashga taklif qildim. Shu gapni gaplashib turgan paytimizda qabuldagilar uning ism-sha’rifini o‘qib qolishdi. Shunga u viloyat hokimi qabuliga bordi”, — deydi Angren shahri hokimi.

To‘g‘ri, avval shahar hokimi qabuliga kirdim. Shahar hokimi muammomni hal qilishini aytib, va’da berdi. Shu payt buyoqdan ism-sharifim o‘qildi. Shunga viloyat hokimi qabulida ham bo‘lib, shahar hokimi muammomni hal qilishini aytganini bildirib, viloyat rahbariga minnatdorlik izhor qilib, qabuldan tezda chiqdim, — deydi Durdona Xoljigitova.

“Daryo” jurnalistining bu haqdagi savoliga javob bergan Ohangaron tumani hokimi Abdurasul Abdullayev tuman hokimidan o‘tib, viloyat hokimi qabuliga oshiqayotgan murojaatchilar asosan noqonuniy talab qo‘yishini, ularni tuman hokimi sifatida o‘n marotalab eshitganini aytmoqda.

Shunday murojaatlar borki, murojaatchi menga birinchi marotaba kelgan paytda, o‘n daqiqada hal bo‘ladi. Bu murojaat qonuniy bo‘lib, uni qonunan hal qilish imkoniyati bizda bor. Ikkinchi toifadagi murojaatlar shunday muammoki, ularning yechimi mablag‘ga borib taqaladi. Bu mablag‘ga tuman budjetining qurbi yetmaydi. Shu toifadagi murojaatchilar viloyatdan ko‘proq pul olish maqsadida viloyat hokimi qabuliga kelyapti. Yana shunday murojaatchilar borki, ularning muammosini nafaqat tuman, balki viloyat ham hal qilolmaydi. Boisi, uning talabi noqonuniy.

Masalan, menga uy bering deb keladi. Qonuniy tomondan olib qaralsa, unga u berish noto‘g‘ri, Nizom talabiga to‘g‘ri kelmaydi. Shu toifadagi fuqarolar viloyat hokimi, shuningdek, respublika darajasidagi tashkilotlarga borib, mana tuman hokimi murojaatimni hal etmayapti deydi. Endi xulosa o‘zingizga”, — deydi hokim.