Kuz-qish mavsumiga tayyorgarlik uchun ajratilgan 2 trln so‘m qanday maqsadlarga yo‘naltirilgan?

AOKAda Uy-joy kommunal xizmat ko‘rsatish vazirligi rahbariyati va mutasaddilari ishtirokida matbuot anjumani o‘tkazildi. Unda ko‘p-qavatli uy-joylarni boshqaruvchi tashkilotlar faoliyati va kuz-qish mavsumiga ko‘rilayotgan tayyorgarlik masalalari muhokama qilindi.

Qayd etilishicha, 23-sentabr kuni Vazirlar Mahkamasining “Iqtisodiyot tarmoqlari, ijtimoiy soha obyektlari va ko‘p kvartirali uy-joy fondini 2022/2023-yillar kuz-qish davrida barqaror ishlashini ta’minlash to‘g‘risida”gi qarori qabul qilingan.

Mazkur qaror bilan respublikada barcha yo‘nalishlar bo‘yicha isitish mavsumi barqaror o‘tishini ta’minlashda aniq vazifalar belgilab berilgan.

Xususan:

• 2967 ta ko‘p kvartirali uy-joy fondi;
• 1815 km uzunlikdagi ichimlik suv tarmoqlari;
• 1689 ta nasos uskunasi;
• 24 ta markaziy va mahalliy qozonxona;
• 809 ta turli markadagi qozon;
• 737 km uzunlikdagi issiqlik tarmoqlari;
• 88 080 km uzunlikdagi elektr uzatish tarmoqlari;
• 29 135 ta tranformator punktini mukammal va joriy ta’mirlash rejalashtirilgan.

Shu bilan birga, ushbu olis hududlardagi 723 ta ijtimoiy soha obyektni isitish mavsumiga tayyorlash, aholiga 1,5 million tonna ichimlik suvini yetkazib berish hamda 1 ming 301 km ichki yo‘llarni ta’mirlash ishlari amalga oshirish zarur bo‘ladi. Yuqorida belgilangan parametrlarni bajarishda 2 trillion so‘m mablag‘ yo‘naltiriladi.