5-oktabr kuni Tailand poytaxti Bangkok shahridagi O‘zbekiston Bosh konsulxonasida Bangkok Islom qo‘mitasi vitse-prezidenti Prasob Pusamleye, Arab universitetlari bitiruvchilari uyushmasi (Arab Universities Alumni Association) prezidenti G‘azi Shamsuddin bilan uchrashuv o‘tkazildi, deb xabar bermoqda “Dunyo” axborot agentligi.
Qayd etilishicha, uchrashuvda Bosh konsulxona tomonidan O‘zbekistonning ziyorat turizm, sayyohlik, gastronomik va qishki turizm bo‘yicha salohiyati hamda hunarmandchilik mahsulotlariga bag‘ishlangan taqdimot namoyish etilgan. Shuningdek, Samarqandda bunyod etilgan “Boqiy shahar” majmuasi va respublikada xorijiy sayyohlarga yaratilgan qulayliklar haqida batafsil ma’lumot berilgan.
Tay tomoni esa Qirollikning musulmon aholisi orasida O‘zbekistonning islom qadamjolarini ziyorat qilish, islom muhaddislari Imom Buxoriy, Imom Termiziy va boshqa buyuk allomalarning ilmiy merosini yaqindan o‘rganishga katta qiziqish mavjudligini ta’kidlagan. Ikki mamlakat o‘rtasida noyabr oyida aviaqatnovlarning tiklanishi mazkur yo‘nalishda sayyohlar oqimini oshirishga xizmat qilishi alohida urg‘ulangan.
Muzokaralar yakunida ziyorat turizm yo‘nalishida tailandlik sayyohlarni respublikaga keng jalb qilish maqsadida O‘zbekistonning islom tamadduni rivojiga qo‘shgan hissasini Tailand musulmon aholisi orasida faol targ‘ib etish bo‘yicha hamkorlikni rivojlantirish, shuningdek, Tailand ilmiy doira vakillarini O‘zbekistonga tashriflarini tashkillashtirishga kelishib olingan.
Uchrashuvda Bangkok Islom qo‘mitasi idorasi tomonidan Imom Buxoriyning “Al-Jomi’ as-sahih” to‘plamining tay tilida nashr etilgan nusxasini O‘zbekistonda taqdim etilishi ma’lum qilingan.
Ma’lumot o‘rnida qayd etish joiz, Bangkok Islom qo‘mitasi idorasi 1945 yilda tashkil etilgan bo‘lib, mazkur shahardagi 180 dan ziyod masjidlar faoliyatini tartibga soladi. Tashkilotning faoliyat yo‘nalishlariga yoshlar masalalarini muvofiqlashtirish, jamiyatdagi birdamlik va konfessiyalararo muloqotni takomillashtirishga xizmat qilish kabi vazifalar ham kiradi.
Izoh (0)