Prezident administratsiyasi rahbari o‘rinbosari Komil Allamjonov AQSH davlat kotibining jamoatchilik bilan aloqalar bo‘yicha yordamchisi vazifasini bajaruvchi Elizabet Tryudo bilan uchrashdi.
Ma’lum qilinishicha, 6-oktabr kuni bo‘lib o‘tgan uchrashuvda davlat organlari ochiqligini ta’minlash, jamoatchilik bilan muloqot, feyk va yolg‘on axborotlarga qarshi kurashish, mass-media sohasini rivojlantirish, aholining mediasavodxonligini oshirish kabi keng ko‘lamli masalalarni muhokama qilinib, o‘zaro fikr almashildi.
“Uchrashuv samimiy va do‘stona ruhda, har ikki tomon uchun samarali o‘tdi. Tryudo xonimning mamlakatimizga tashrif buyurganidan xursand bo‘ldim. U bilan suhbatlashish, yurtimizdagi o‘zgarishlar haqidagi taassurotlarini eshitish yoqimli bo‘ldi”, — deb yozgan Allamjonov o‘zining ijtimoiy tarmoqdagi sahifasida.
Elizabet Tryudo yetakchi diplomat bo‘lib, avval Shimoliy Irlandiya va Pokistondagi AQSH Bosh konsuli, AQSHning NATOdagi missiyasi maslahatchisi, AQSHning Janubiy Afrikadagi missiyasi matbuot attashesi, Davlat departamenti matbuot ishlari bo‘yicha direktori lavozimlarida ishlagan. Hozirgi lavozimiga qadar u Mudofaa vazirining jamoatchilik bilan aloqalar bo‘yicha yordamchisining birinchi o‘rinbosari lavozimida faoliyat yuritgan.
U boshchiligidagi AQSH delegatsiyasi O‘zbekistonga to‘rt kunlik tashrif bilan kelgandi.
Izoh (0)