“Ba’zi mansabdorlar o‘z foydasiga yopiq qilib olgan bu ma’lumotni”. Rasul Kusherbayev shaharlarning bosh rejasini maxfiy hujjatlar qatoridan chiqarish kerakligi haqida

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda yangi — “Mahalla. Muammo. Mulohaza” loyihasini boshladi. Ko‘rsatuvning 1-soni mehmoni Rasul Kusherbayev shaharlarning bosh rejasini maxfiy hujjatlar qatoridan olib, jamoatchilik uchun ochiq qilish kerakligini aytdi.

Qonunchilik palatasi deputatining aytishicha, shaharning bosh rejasi maxfiy hujjatlar qatorida bo‘lishi — mantiqsiz. Xavfsizlik bilan bog‘liq ma’lumotlarni berkitgan holda, ma’lum hududning kelajakda qay ko‘rinishda bo‘lishini odamlarga ko‘rsatish zarur.

Bizda negadir hali ham shaharlarning bosh rejalarini maxfiy hujjatlar qatoriga qo‘shib qo‘yishgan. Aholi bilmaydi o‘z mahallasi kelajakda qanday ko‘rinishda bo‘lishini. Ba’zilari uyini ta’mirlamoqchi, o‘zgartirmoqchi bo‘ladi-da, lekin rejada nima yozilganini bilmaydi. Balki buzilib ketar u joylar hali.

Hech bo‘lmaganda o‘sha kommunikatsiya, boshqa ma’lumotlarni ko‘rsatmagan holda ochish mumkin-ku. Umumiy binolarning ko‘rinishi, joylashuvini ko‘rsatish kerak. Bizda hatto shuni ham yopib tashlashgan-da, — deydi deputat.

Alaloqibat, fuqarolar e’tiroz bildiradi sen boshqa gap aytganding-ku deb. Lekin isbot yo‘q. Bularning hammasi bosh rejaning yo‘qligidan. Ba’zi mansabdorlar o‘z foydasiga yopiq qilib olgan bu ma’lumotni. Aslida berkitadigan joyi yo‘q. Faqat o‘sha strategik, energetik qismlari bo‘lishi mumkin, xavfsizlik nuqtayi nazardan yopiq qilish kerak bo‘lgan. Qolgan joylarini qism-qism qilib ochib berish mumkin-da. Taxminan aytib berish mumkin-ku bu yerga nima tushadi, qanaqa ijtimoiy obyekt ekanini. Buning nimasi maxfiy?

Shu narsalar ochiq bo‘lsa, fuqarolar davlat organlari bilan dialogga kirishishni boshlaydi. Har bir masalada fikrlashadi, — deya fikrlarini yakunlagan mehmon.