Yadro urushining boshlanishiga yo‘l qo‘ymaslik borasidagi bayonotga to‘laligicha sodiqmiz — Rossiya Tashqi ishlar vazirligi

Rossiya Tashqi ishlar vazirligi Kremlning yadro urushiga yo‘l qo‘yib bo‘lmasligi haqidagi pozitsiyasiga sodiqligini e’lon qildi, deya xabar qiladi “RBK”.

Yanvar oyida yadro quroliga ega bo‘lgan beshta davlat rahbarlari tomonidan ushbu quroldan foydalanish bilan urush boshlanmasligi kerak, chunki unda g‘oliblar bo‘lmaydi, deya ta’kidlangan edi. Moskva bu pozitsiyada davom etishini bildirdi

“Moskva yadroviy davlatlar o‘rtasida urushga yo‘l qo‘yib bo‘lmasligi haqidagi postulatni qo‘llab-quvvatlashda davom etmoqda”, — dedi Rossiya Tashqi ishlar vazirligining Yadro qurollarini tarqatmaslik va nazorat qilish departamenti direktori Vladimir Yermakov BMT Bosh Assambleyasi birinchi qo‘mitasi oldida.

“Biz eng muhim vazifalardan biri yadroviy beshlikka kiruvchi barcha mamlakatlarning yadro quroliga ega davlatlar o‘rtasida har qanday urushga yo‘l qo‘yib bo‘lmasligi haqidagi postulatga sodiqligini saqlab qolishdir, deb hisoblaymiz, bu yadroviy kuchlar rahbarlarining yanvar oyidagi qo‘shma bayonotida o‘z aksini topgan.  Rossiya bunga to‘laligicha sodiq”, — dedi murojaatni o‘qib eshittirgan Rossiya delegatsiyasi rahbari o‘rinbosari Konstantin Vorontsov.

Yanvar oyidagi bayonotni “beshlik” yadroviy davlat rahbarlari (Rossiya, AQSH, Xitoy, Buyuk Britaniya va Fransiya) amalga oshirgan. “Yadro urushida g‘oliblar bo‘lmaydi va hech qachon uning ishlatilishiga yo‘l qo‘lmaslik kerak”, — deyilgan bayonotda.

Rossiya prezidenti Vladimir Putin 21-sentabr kuni qilgan murojaatida “bizni yadro quroli bilan shantaj qilmoqchi bo‘lganlar bilishi kerakki, shamol guli o‘z tomoniga burilishi mumkin” degan edi.

Yadro qurolidan foydalanishni mamlakat Xavfsizlik kengashi raisi o‘rinbosari Dmitriy Medvedev va Checheniston rahbari Ramzan Qodirov ham eslab o‘tgan.

G‘arbda Putinning bu gaplari “mas’uliyatsiz” deb baholanib, yadro qurolidan foydalanish Moskvaga o‘z ta’sirini ko‘rsatishi haqida ogohlantirilgan. Qo‘shma Shtatlar ham Rossiyaning yadro qurolidan foydalanishga tayyorlanayotgani alomatlarini ko‘rmayotganini ta’kidladi.

Putinning matbuot kotibi Dmitriy Peskov esa Moskva G‘arbning “yadroviy ritorika”sida ishtirok etishni istamasligiga ishora qilgan edi.