Россия Ташқи ишлар вазирлиги Кремлнинг ядро урушига йўл қўйиб бўлмаслиги ҳақидаги позициясига содиқлигини эълон қилди, дея хабар қилади «РБК».
Январь ойида ядро қуролига эга бўлган бешта давлат раҳбарлари томонидан ушбу қуролдан фойдаланиш билан уруш бошланмаслиги керак, чунки унда ғолиблар бўлмайди, дея таъкидланган эди. Москва бу позицияда давом этишини билдирди
«Москва ядровий давлатлар ўртасида урушга йўл қўйиб бўлмаслиги ҳақидаги постулатни қўллаб-қувватлашда давом этмоқда», — деди Россия Ташқи ишлар вазирлигининг Ядро қуролларини тарқатмаслик ва назорат қилиш департаменти директори Владимир Ермаков БМТ Бош Ассамблеяси биринчи қўмитаси олдида.
«Биз энг муҳим вазифалардан бири ядровий бешликка кирувчи барча мамлакатларнинг ядро қуролига эга давлатлар ўртасида ҳар қандай урушга йўл қўйиб бўлмаслиги ҳақидаги постулатга содиқлигини сақлаб қолишдир, деб ҳисоблаймиз, бу ядровий кучлар раҳбарларининг январь ойидаги қўшма баёнотида ўз аксини топган. Россия бунга тўлалигича содиқ», — деди мурожаатни ўқиб эшиттирган Россия делегацияси раҳбари ўринбосари Константин Воронцов.
Январь ойидаги баёнотни «бешлик» ядровий давлат раҳбарлари (Россия, АҚШ, Хитой, Буюк Британия ва Франция) амалга оширган. «Ядро урушида ғолиблар бўлмайди ва ҳеч қачон унинг ишлатилишига йўл қўлмаслик керак», — дейилган баёнотда.
Россия президенти Владимир Путин 21 сентябрь куни қилган мурожаатида «бизни ядро қуроли билан шантаж қилмоқчи бўлганлар билиши керакки, шамол гули ўз томонига бурилиши мумкин» деган эди.
Ядро қуролидан фойдаланишни мамлакат Хавфсизлик кенгаши раиси ўринбосари Дмитрий Медведев ва Чеченистон раҳбари Рамзан Қодиров ҳам эслаб ўтган.
Ғарбда Путиннинг бу гаплари «масъулиятсиз» деб баҳоланиб, ядро қуролидан фойдаланиш Москвага ўз таъсирини кўрсатиши ҳақида огоҳлантирилган. Қўшма Штатлар ҳам Россиянинг ядро қуролидан фойдаланишга тайёрланаётгани аломатларини кўрмаётганини таъкидлади.
Путиннинг матбуот котиби Дмитрий Песков эса Москва Ғарбнинг «ядровий риторика»сида иштирок этишни истамаслигига ишора қилган эди.
Изоҳ (0)