Rossiya Mudofaa vazirligi kundalik brifingda ma’lum qilishicha, “qamalda qolish xavfi yuzaga kelgani tufayli” Rossiya qo‘shinlari Limandan “manfaatliroq chegaralarga” olib ketilgan.
Avvalroq Ukraina harbiylari Liman shahriga kirgani xabar berilgandi, u yoz boshida Rossiya qo‘shinlari tomonidan egallab olingandi.
Checheniston rahbari Ramzan Qodirov Rossiya qo‘shinlari Limanni qo‘ldan boy bergani yuzasidan o‘z Telegram-kanalida post qoldirib, Markaziy harbiy okrug qo‘mondoni general-polkovnik Aleksandr Lapinni keskin tanqid qildi.
Qodirovning yozishicha, Lapin ushbu hudud mudofaasiga rahbarlik qilgan va qo‘shinlarni “zarur aloqa, hamkorlik va o‘q-dorilar” bilan ta’minlamagan. Shuningdek, u jangovar harakatlar zonasida voqealar qanday rivojlanayotgani yuzasidan norozilik bildirdi.
“Shaxsiy fikrimcha, yanada keskinroq choralar qabul qilish kerak — chegaraga yaqin hududlarda harbiy holat e’lon qilish va kam quvvatli yadro qurolini qo‘llashgacha”, — dedi Qodirov.
Ukraina Qurolli kuchlari Liman yo‘nalishida hujumga o‘tishni bir necha hafta avval boshlagan. Oktabr boshiga kelib, Ukraina harbiylari shahar atrofidagi bir nechta aholi punktlarini egalladi, natijada Rossiya qo‘shinlari qamal xavfi ostida qoldi. Rossiya harbiy muxbirlari mamlakat Qurolli kuchlari Limandan chiqqani haqida ma’lum qilgandi. 1-oktabr kuni shaharga Ukraina harbiylari kirganini isbotlovchi foto va videodalillar paydo bo‘ldi.
Izoh (0)