AQSHning Sharqiy sohillariga yopirilgan “Ien” dovuli Florida va Shimoliy Karolina shtatlarida 77 kishining umriga zomin bo‘ldi, o‘n mingdan ortiq odam bedarak yo‘qolgan deb hisoblanilmoqda. Bu haqda Sky News xabar berdi.
Halok bo‘lganlarning 73 nafari Floridada bo‘lib, ular asosan suvga g‘arq bo‘lish oqibatida nobud bo‘lgan. Shuningdek, dovulning bavosita ta’siri ham bo‘lgan: keksa er-xotin elektr energiyasi uzilib qolishi natijasida kislorod qurilmalari ishlashdan to‘xtab qolganidan keyin vafot etgan.
Yana to‘rtta o‘lim Shimoliy Karolinada qayd etilgan, shu jumladan, ikki kishi YTH oqibatida halok bo‘lgan.
O‘n mingdan ortiq odam bedarak yo‘qolgan deb hisoblanilmoqda. Hukumat fikricha, ularning ko‘pchiligi pana joylarga yashiringan yoki elektr ta’minoti bilan bog‘liq muammolar tufayli aloqaga chiqa olmayapti.
“Ien” kuchsizlashgan va endi siklonga aylangan, lekin u hali ham xavfli, deya ogohlantirmoqda rasmiylar. Shu dam olish kunlari murakkab ob-havo sharoitlari Atlantika sohillarining keng hududlarida, jumladan, Nyu-York va Nyu-Jersi shtatlarida, poytaxt Vashingtonda yuzaga kelishi kutilmoqda.
Avvalroq 42 nafar qurbon haqida xabar berilgan edi. “Ien” dovuli Floridaga 28-sentabr kuni yopirildi.Shamolning tezligi soatiga 250 km ga yetgan. Shtatda ko‘plab vayronagarchiliklar qayd etildi, 2,5 millionga yaqin odam elektr energiyasidan mahrum bo‘ldi, telekommunikatsiya tarmoqlari uzildi, aeroportlar yopildi.
Izoh (0)