Россия Мудофаа вазирлиги кундалик брифингда маълум қилишича, «қамалда қолиш хавфи юзага келгани туфайли» Россия қўшинлари Лимандан «манфаатлироқ чегараларга» олиб кетилган.
Аввалроқ Украина ҳарбийлари Лиман шаҳрига киргани хабар берилганди, у ёз бошида Россия қўшинлари томонидан эгаллаб олинганди.
Чеченистон раҳбари Рамзан Қодиров Россия қўшинлари Лиманни қўлдан бой бергани юзасидан ўз Telegram-каналида пост қолдириб, Марказий ҳарбий округ қўмондони генерал-полковник Александр Лапинни кескин танқид қилди.
Қодировнинг ёзишича, Лапин ушбу ҳудуд мудофаасига раҳбарлик қилган ва қўшинларни «зарур алоқа, ҳамкорлик ва ўқ-дорилар» билан таъминламаган. Шунингдек, у жанговар ҳаракатлар зонасида воқеалар қандай ривожланаётгани юзасидан норозилик билдирди.
«Шахсий фикримча, янада кескинроқ чоралар қабул қилиш керак — чегарага яқин ҳудудларда ҳарбий ҳолат эълон қилиш ва кам қувватли ядро қуролини қўллашгача», — деди Қодиров.
Украина Қуролли кучлари Лиман йўналишида ҳужумга ўтишни бир неча ҳафта аввал бошлаган. Октябрь бошига келиб, Украина ҳарбийлари шаҳар атрофидаги бир нечта аҳоли пунктларини эгаллади, натижада Россия қўшинлари қамал хавфи остида қолди. Россия ҳарбий мухбирлари мамлакат Қуролли кучлари Лимандан чиққани ҳақида маълум қилганди. 1 октябрь куни шаҳарга Украина ҳарбийлари кирганини исботловчи фото ва видеодалиллар пайдо бўлди.
Изоҳ (0)