Venesuela prezident Nikolas Maduroning ikki qarindoshi evaziga, yetti nafar Amerika fuqarosini, shu jumlada, neft kompaniyasining besh nafar rahbarini ozod qildi, deb yozadi Reuters AQSH rasmiylariga tayanib.
Ayirboshlashuvga bir necha yillardan buyon hibsda saqlanib kelingan AQSHning Citgo Petroleum kompaniyasi rahbarlari, shuningdek, Amerika dengiz piyodalari faxriysi Metyu Xit va Osman Xan ismli yana bir AQSH fuqarosi kiritildi. Ular Venesuela birinchi xonimining 2015-yilda hibsga olingan ikki nafar jiyaniga almashtirildi.
AQSH prezidenti Jo Bayden “adolatsiz ravishda qo‘lga olingan” amerikaliklar tez orada o‘z qarindoshlari bilan qayta birlashishini ma’lum qildi.
Citgo Petroleum kompaniyasi rahbarlari 2017-yilda Venesuela hukumati tomonidan qo‘lga olingan va “tegishli huquqiy jarayonlarsiz” aybdor deb topilgan xodimlari ozod etilganini olqishladi. Ular talon-taroj qilish, pul yuvish va til biriktirish ayblovlari bilan 8 yildan 13 yilgacha ozodlikdan mahrum qilingandi.
Amerikalik mansabdorning so‘zlariga ko‘ra, mahburlar bilan ayirboshlashuv Maduro hukumati bilan oylab davom etgan maxfiy muzokaralardan keyin uchinchi mamlakat aeroportida sodir bo‘lgan. U gap aynan qaysi mamlakat haqida borayotganiga aniqlik kiritmadi.
Nikolas Maduroning rafiqasi Siliya Floresning jiyanlari 2015-yilda Gondurasdan AQSHga 800 kg kokain yuborishga urinishda ayblanib, hibsga olingandi.
Izoh (0)