Polsha Belarus bilan chegarada to‘siq qurishni yakunladi, bu haqda Polsha maxsus xizmatlari vakili Stanislav Jarin ma’lum qildi.
“Ayni paytda Polshaga noqonuniy kirish imkoni yo‘q. Bugungi kunda Polsha chegarasi — Yevropada eng kuchli himoyalangan chegara”, — deb yozdi u Twitter’da va devor suratlarini ilova qildi.
Polsha chegarada devor qurishni 2021-yil boshida Belarus orqali Yevroittifoqqa noqonuniy o‘tishga urinayotgan muhojirlar oqimi ko‘payishi tufayli boshlagandi. Yevroittifoq migratsiya inqirozi yuzaga kelishida Belarus hukumatini aybladi va mamlakat huquq-tartibot organlari noqonuniy muhojirlarni to‘xtatishga harakat qilmaslik bilan birga, ularni ataylab chegaraga yaqin hududga olib kelayotganini da’vo qildi.
2021-yil sentabrida Polsha hukumati 418 kilometrlik to‘siq qurilishini ma’qullagandi.
Chegarada devor qurish taxminan 1,6 milliard zlotiy (330 million yevro)ga tushdi.
Avvalroq Polsha hukumati devor qurish uchun 49 ming tonna po‘latdan foydalanilganini ma’lum qilgandi. Shuningdek, to‘siqni 2,5 mingta kuzatuv kamerasi bilan jihozlash rejalashtirilayotgandi.
Avgust oxirida Litva ham Belarus bilan chegaradagi devor qurilishini yakunlagan edi.
Mavzuga doir:
Izoh (0)