Rossiya federal xavfsizlik xizmati Tergov boshqarmasi Rossiyaning “Shimoliy oqim — 1” va “Shimoli oqim — 2” gaz quvurlariga zarar yetganidan keyin jinoyat ishi qo‘zg‘atdi.
Bosh prokuratura xabariga ko‘ra, tekshiruv Jinoyat kodeksining 361-moddasi 1-qismi bo‘yicha olib borilmoqda (“Xalqaro terrorizm harakati”, 10 yildan 20 yilgacha yoki bir umrlik qamoq jazosini ko‘zda tutadi).
Muassasadan ma’lum qilishlaricha, “Rossiya Federatsiyasi gaz quvurlariga zarar berish bo‘yicha qasddan harakatlar natijasida sezilarli darajada iqtisodiy ziyon yetkazilgan”.
26-sentabrga o‘tar kechasi Boltiq dengizidagi Bornxolm oroli yaqinida “Shimoliy oqim — 1” va “Shimoliy oqim — 2” gaz quvurlarining uchta tarmog‘ida gaz sizib chiqishi boshlandi. Yevroittifoq hukumati “Shimoliy oqim”ga ataylab ziyon yetkazilganini ma’lum qildi. Hodisa yuzasidan Germaniya, Daniya va Shvetsiyada tekshiruvlar olib borildi.
Huquq-tartibot organlari gumon qilishicha, bu g‘avvoslar yoki suvosti kemasidan foydalanib amalga oshirilgan qo‘poruvchilik harakati bo‘lgan. Germaniya xavfsizlik xizmatlari gaz quvuri butunlay yaroqsiz holga kelishini taxmin qilmoqda.
Ushbu gaz quvurlari orqali Rossiya ham sanoat maqsadlarida foydalanish uchun, ham turar joylarni isitish uchun Yevroittifoq mamlakatlariga tabiiy gaz yetkazib bergan.
Bu orada Rossiya OAVlarida Flightradar ma’lumotlari asosida paydo bo‘lgan xabarlarga ko‘ra, Sikorsky MH-60R Strike Hawk vertolyoti 25—26-sentabr oralig‘ida Boltiq dengizi akvatoriyasi osmonida gaz sizib chiqqan joydan taxminan 250 km masofada to‘qqiz soat davomida uchib yurgan.
Qayd etilishicha, ushbu vertolyot qirg‘oqbo‘yida shiddatli jangovar harakatlar olib borish va ochiq suvda operatsiyalar o‘tkazish uchun foydalaniladi.
Izoh (0)