Moskvaning Lefortovo sudi maxsus xizmatlar tomonidan hibsga olingan va josuslikda gumonlanayotgan xorij fuqarosi Vladislav Krivoyga nisbatan jinoiy ish ochgan. Bu haqida sud matbuot xizmatiga tayanib, Meduza xabar berdi.
Sud ish tafsilotlari va qo‘lga olingan shaxs, jumladan, u qaysi davlat fuqarosi ekanligi haqidagi ma’lumotlarni oshkor qilmadi va bu maxfiy ma’lumot ekanligini tushuntirdi. Krivoy qachon hibsga olingani ham aniqlanmagan. Rossiya Federatsiyasi Jinoyat kodeksining 276-moddasiga ko‘ra, u 10 yildan 20 yilgacha ozodlikdan mahrum etilishi mumkin.
Ommaviy axborot vositalari avvalroq yozganidek Vladislav Krivoy Ukraina fuqarosi va sobiq SBU zobiti, deya taxmin qildi “TASS”.
May oyida REN TV “Izvestiya” muxbiri Ivan Litomin va hibsga olingan shaxs o‘rtasidagi suhbatdan iborat video va reportajni e’lon qilgan edi. Telekanal veb-saytidagi materiallarda Krivoy Rossiya qo‘shinlari tomonidan bosib olingan Xersonda hibsga olingan “sobiq SBU agenti” va “Ukraina Qurolli kuchlarining o‘qotari” deb berilgan.
Krivoy “Izvestiya” xodimiga bergan intervyusida aytganidek, u 2014-yildan beri Ukraina maxsus xizmatlari bilan hamkorlik qilib keladi, 2022-yil martidan esa Rossiya harbiy texnikasi joylashuvi haqida ma’lumot to‘playdi. Krivoy qanday sharoitda intervyu bergani noma’lum.
Izoh (0)