Россия федерал хавфсизлик хизмати Тергов бошқармаси Россиянинг «Шимолий оқим — 1» ва «Шимоли оқим — 2» газ қувурларига зарар етганидан кейин жиноят иши қўзғатди.
Бош прокуратура хабарига кўра, текширув Жиноят кодексининг 361-моддаси 1-қисми бўйича олиб борилмоқда («Халқаро терроризм ҳаракати», 10 йилдан 20 йилгача ёки бир умрлик қамоқ жазосини кўзда тутади).
Муассасадан маълум қилишларича, «Россия Федерацияси газ қувурларига зарар бериш бўйича қасддан ҳаракатлар натижасида сезиларли даражада иқтисодий зиён етказилган».
26 сентябрга ўтар кечаси Болтиқ денгизидаги Борнхолм ороли яқинида «Шимолий оқим — 1» ва «Шимолий оқим — 2» газ қувурларининг учта тармоғида газ сизиб чиқиши бошланди. Евроиттифоқ ҳукумати «Шимолий оқим»га атайлаб зиён етказилганини маълум қилди. Ҳодиса юзасидан Германия, Дания ва Швецияда текширувлар олиб борилди.
Ҳуқуқ-тартибот органлари гумон қилишича, бу ғаввослар ёки сувости кемасидан фойдаланиб амалга оширилган қўпорувчилик ҳаракати бўлган. Германия хавфсизлик хизматлари газ қувури бутунлай яроқсиз ҳолга келишини тахмин қилмоқда.
Ушбу газ қувурлари орқали Россия ҳам саноат мақсадларида фойдаланиш учун, ҳам турар жойларни иситиш учун Евроиттифоқ мамлакатларига табиий газ етказиб берган.
Бу орада Россия ОАВларида Flightradar маълумотлари асосида пайдо бўлган хабарларга кўра, Sikorsky MH-60R Strike Hawk вертолёти 25—26 сентябрь оралиғида Болтиқ денгизи акваторияси осмонида газ сизиб чиққан жойдан тахминан 250 км масофада тўққиз соат давомида учиб юрган.
Қайд этилишича, ушбу вертолёт қирғоқбўйида шиддатли жанговар ҳаракатлар олиб бориш ва очиқ сувда операциялар ўтказиш учун фойдаланилади.
Изоҳ (0)