O‘z-o‘zini xalq respublikasi deb e’lon qilgan Lugansk rahbari Leonid Pasechnik Rossiya prezidentiga murojaat qilib, “LXRning subyekt huquqi asosida RF tarkibiga kirishi masalasini ko‘rib chiqishni iltimos” qildi. Bu haqda “TASS” xabar bermoqda.
Pasechnik bu haqda maxsus yozib olingan telemurojaatida aytib o‘tgan. U, shuningdek, LXRdagilar “Rossiyaning ko‘p millatli xalqi bilan tarixiy, madaniy va ma’naviy aloqasini” anglashini ta’kidladi.
“RIA Novosti” xabariga ko‘ra, Xerson viloyati istilo ma’muriyati rahbari Vladimir Saldo ham Putinga “Rossiya tarkibiga qo‘shilish”ni so‘rab murojaat qilgan.
Rasman tasdiqlanmagan ma’lumotlarga ko‘ra, Rossiya prezidenti Vladimir Putin LXDR, DXR hamda Xerson va Zaporojye viloyatlarining bosib olingan hududlari RF tarkibiga qo‘shilganini 30-sentabr kuni e’lon qilishi mumkin.
Shundan keyin parlamentning ikkala palatasi ham Putin tomonidan imzolangan tegishli qonunlarni ma’qullashi mumkin. Davlat dumasi spikeri Vyacheslav Volodin ma’lum qilishicha, Rossiya parlamentining quyi palatasi 3-oktabr kuni rejadan tashqari majlisiga yig‘iladi, bunday qaror aynan nima bilan bog‘liqligiga u aniqlik kiritmadi.
Rossiya parlamentining yuqori palatasi Federatsiya kengashi esa anneksiyani 4-oktabr kungi majlisda tasdiqlashi mumkin. Spiker Valentina Matviyenko bu masalada rejadan tashqari yig‘ilish o‘tkazilmasligini ma’lum qildi.
Avvalroq DXR rahbari Denis Pushilin “Rossiyaga qo‘shilish bo‘yicha yuridik jarayon”ni yakunlash uchun Moskvaga yo‘l olganini ma’lum qilgandi. XUddi shunday maqsad bilan Rossiyaga safari haqida LXR rahbari ham aytib o‘tgandi.
Referendumlar
Rossiya tarkibiga kirish haqidagi referendumlarda ovoz berish 27-sentabr kuni yakunlandi. 28-sentabr kuni ertalab Donbass saylov komissiyalari ovozlarning 100 foizi ko‘rib chiqilganidan keyin referendumlar natijalarini e’lon qildi. Ularning aytishicha, LXR saylovchilarining 98,42 foizi, DXR elektoratining 99,23 foizi, Zaporojye va Xerson viloyatlari bosib olingan hududlari aholisining esa tegishli ravishda 93,1 foizi va 87,05 foizi Rossiya tarkibiga qo‘shilishni yoqlab ovoz bergan.Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Izoh (0)