«Толибон» Россия билан Афғонистонга бензин, дизель ёнилғиси, газ ва буғдой етказиб бериш бўйича дастлабки келишувни имзолади. Бу ҳақда мамлакатнинг Савдо ва саноат вазири вазифасини бажарувчи Ҳожи Нуруддин Азизий Reuters агентлигига маълум қилди. Расмийнинг таъкидлашича, Россия ушбу товарларга чегирма таклиф қилган.
Шу тариқа «Толибон» бир йил аввал ҳокимиятга келганидан буён биринчи йирик халқаро иқтисодий келишувга эришди. Ҳеч бир давлат, жумладан Россия ҳам «Толибон» ҳукуматини қонуний деб расман тан олмайди. Кремль ҳаракатни террорчи ташкилот деб билади, лекин вақти-вақти билан «Толибон» аъзоларини Москвада қабул қилади.
Афғонистонлик расмийнинг айтишича, келишув доирасида Россия мамлакатга йилига бир миллион тоннага яқин бензин ва дизель ёнилғиси, 500 минг тонна суюлтирилган газ ва икки миллион тонна буғдой етказиб беради. Шартномаларда қанча вақт давом этиши номаълум синов муддати кўзда тутилган. Ундан кейин узоқ муддатли шартнома имзоланади.
Азизий нархлар ва тўлов усуллари ҳақидаги маълумотни ошкор қилмади. Аммо унинг сўзларига кўра, Россия автомобиль ва темир йўл орқали етказиб бериш бўйича жаҳон бозорлари билан солиштирганда чегирма нархга рози бўлган.
«Нима қилган бўлсак ҳам, миллий манфаатлар ва халқ манфаатидан келиб чиқяпмиз», — деди Азизий.
Мазкур келишувга эришиш учун ўтган ой Азизий бошчилигидаги делегация Москвага келиб, бир неча ҳафта музокаралар олиб борган эди.
Изоҳ (0)