“Urushga yollanganlik uchun O‘zbekistonda, Ukrainada va hatto Rossiyada ham jinoiy javobgarlik belgilangan” — huquq faoli Botirjon Shermuhammad

Fevral oyidan buyon davom etayotgan Rossiya va Ukraina o‘rtasidagi urushga Rossiyada ishlayotgan migrantlarni, xususan, o‘zbekistonliklarni ham jalb qilish va buning evaziga fuqarolikka ega bo‘lish va’da qilinmoqda. Ushbu holat yuzasidan Rossiyada asosan o‘zbekistonlik migrantlarga ko‘mak beruvchi huquq faoli Botirjon Shermuhammad munosabat bildirdi.

Uning alohida ta’kidlashicha, Rossiyaga ishlash uchun borgan o‘zbekistonliklarning Ukraina hududidagi harbiy harakatlarga ochiqdan ochiq targ‘ib qilinishi xavfli, albatta, juda ham xavotirli.

“Rossiya fuqaroligini va’da qilish ba’zi fuqarolarimizga jozibali ko‘rinishi va ular bunga rozi bo‘lishi mumkin. Albatta, bu xavotirlanarli holat. Bu holatda biz o‘zimizning vatandoshlarimizga aytamizki, urushga yollanishga e’tibor berishimiz kerak, O‘zbekistonda jinoyat hisoblanadi. O‘zbekiston Jinoyat kodeksining 154-moddasiga ko‘ra, ‘yollanish’ degan band bor, 5 yildan 10 yilgacha jinoiy javobgarlikka tortiladi. Bunday odamlar Ukraina uchun ham jinoyatchi hisoblanadi va Rossiyaning o‘zining qonunchiligida ham ‘yollanish’ degan modda bor. U uchun ham javob berishi mumkin. Shuni e’tiborga olish kerakki, bu birdan Rossiya fuqaroligini beradi degani emas. Faqatgina qonunda shunaqa imkoniyat qabul qilindi. Agar tegishli hujjatlar bo‘lsa, barcha tekshiruvlardan to‘g‘ri o‘tadigan bo‘lsa, ana o‘shandagina ma’lum muddatdan so‘ng berishlari mumkin”, – dedi Botirjon Shermuhammad.

Huquq faolining qo‘shimcha qilishicha, 2021-yilning o‘zida 31 ming nafardan ortiq, 2022-yilning 6 oyida 13 ming nafar O‘zbekiston fuqarosi Rossiya fuqaroligini olgan.

“Ularning ko‘pchilik qismi O‘zbekiston fuqaroligidan voz kechmagan holda fuqarolik olgan. Ana o‘shalar ham, yoshi to‘g‘ri kelsa, harbiy safarbarlikka chaqirilishlari, urushda qatnashishga majbur bo‘lib qolishlari mumkin. Ularda O‘zbekiston pasporti ham, Rossiya fuqaroligi ham bor. Bu uchun ular jinoiy javobgarlikka tortilishi ehtimoldan holi emas”, – dedi u.

Mavzuga doir: 

• “Hozir Rossiyadan zudlik bilan ketish kerak bo‘lgan vaziyat yo‘q” – yurist migrantlar harbiy safarbarlikka majburan jalb etilmayotgani haqida
• “Urush shamoli deyarli har bir rossiyalikning xonadoniga kirib borishiga ko‘p qolmadi”. Putinning qisman safarbarlik haqidagi farmonini o‘zbek jamoatchiligi qanday qabul qildi?
• “Bizning o‘zbek musulmon vatandoshlarimiz rus qo‘shinlari safida jang qilishi nafaqat jinoyat, balki shar’an harom amal” — Mubashshir Ahmad
• Bosh prokuratura Rossiyadagi o‘zbekistonliklarni harbiy harakatlarga qo‘shilmaslikka chaqirdi