Февраль ойидан буён давом этаётган Россия ва Украина ўртасидаги урушга Россияда ишлаётган мигрантларни, хусусан, ўзбекистонликларни ҳам жалб қилиш ва бунинг эвазига фуқароликка эга бўлиш ваъда қилинмоқда. Ушбу ҳолат юзасидан Россияда асосан ўзбекистонлик мигрантларга кўмак берувчи ҳуқуқ фаоли Ботиржон Шермуҳаммад муносабат билдирди.
Унинг алоҳида таъкидлашича, Россияга ишлаш учун борган ўзбекистонликларнинг Украина ҳудудидаги ҳарбий ҳаракатларга очиқдан очиқ тарғиб қилиниши хавфли, албатта, жуда ҳам хавотирли.
«Россия фуқаролигини ваъда қилиш баъзи фуқароларимизга жозибали кўриниши ва улар бунга рози бўлиши мумкин. Албатта, бу хавотирланарли ҳолат. Бу ҳолатда биз ўзимизнинг ватандошларимизга айтамизки, урушга ёлланишга эътибор беришимиз керак, Ўзбекистонда жиноят ҳисобланади. Ўзбекистон Жиноят кодексининг 154-моддасига кўра, ‘ёлланиш’ деган банд бор, 5 йилдан 10 йилгача жиноий жавобгарликка тортилади. Бундай одамлар Украина учун ҳам жиноятчи ҳисобланади ва Россиянинг ўзининг қонунчилигида ҳам ‘ёлланиш’ деган модда бор. У учун ҳам жавоб бериши мумкин. Шуни эътиборга олиш керакки, бу бирдан Россия фуқаролигини беради дегани эмас. Фақатгина қонунда шунақа имконият қабул қилинди. Агар тегишли ҳужжатлар бўлса, барча текширувлардан тўғри ўтадиган бўлса, ана ўшандагина маълум муддатдан сўнг беришлари мумкин», – деди Ботиржон Шермуҳаммад.
Ҳуқуқ фаолининг қўшимча қилишича, 2021 йилнинг ўзида 31 минг нафардан ортиқ, 2022 йилнинг 6 ойида 13 минг нафар Ўзбекистон фуқароси Россия фуқаролигини олган.
«Уларнинг кўпчилик қисми Ўзбекистон фуқаролигидан воз кечмаган ҳолда фуқаролик олган. Ана ўшалар ҳам, ёши тўғри келса, ҳарбий сафарбарликка чақирилишлари, урушда қатнашишга мажбур бўлиб қолишлари мумкин. Уларда Ўзбекистон паспорти ҳам, Россия фуқаролиги ҳам бор. Бу учун улар жиноий жавобгарликка тортилиши эҳтимолдан ҳоли эмас», – деди у.
Мавзуга доир:
- «Ҳозир Россиядан зудлик билан кетиш керак бўлган вазият йўқ» – юрист мигрантлар ҳарбий сафарбарликка мажбуран жалб этилмаётгани ҳақида
- «Уруш шамоли деярли ҳар бир россияликнинг хонадонига кириб боришига кўп қолмади». Путиннинг қисман сафарбарлик ҳақидаги фармонини ўзбек жамоатчилиги қандай қабул қилди?
- «Бизнинг ўзбек мусулмон ватандошларимиз рус қўшинлари сафида жанг қилиши нафақат жиноят, балки шаръан ҳаром амал» — Мубашшир Аҳмад
- Бош прокуратура Россиядаги ўзбекистонликларни ҳарбий ҳаракатларга қўшилмасликка чақирди
Изоҳ (0)