“Urush shamoli deyarli har bir rossiyalikning xonadoniga kirib borishiga ko‘p qolmadi”. Putinning qisman safarbarlik haqidagi farmonini o‘zbek jamoatchiligi qanday qabul qildi?
Rossiya prezidenti Vladimir Putin 21-sentabr kuni mamlakatda qisman safarbarlik e’lon qilish haqidagi farmonni imzoladi. Mudofaa vazirligi rahbari Shoyguning so‘zlariga ko‘ra, Rossiyada katta safarbarlik resursi qariyb 25 million kishini tashkil etadi, shundan 1 foizdan ko‘prog‘i — 300 ming kishi qisman safarbarlikka tortiladi. Talabalar va shartnoma asosida harbiy xizmat o‘tovchilarni urushga safarbar qilish haqida gap yo‘q.
Safarbarlik e’lon qilinganidan keyin bir necha daqiqalar ichida Moskvadan Istanbulga, Tbilisi va Yerevanga to‘g‘ridan to‘g‘ri reyslar uchun chiptalar to‘liq sotilib ketdi. Shuningdek, Moskvadan Toshkentga reyslar chiptalari ham qolmagan.
Rossiyada bo‘layotgan o‘zgarishlar butun dunyo e’tibori markazida turibdi. Xususan, migrantlari ushbu mamlakatda eng ko‘p bo‘lgan O‘zbekistonda ham voqealar rivoji diqqat bilan kuzatib borilmoqda, o‘zbek jamoatchiligi fikr-mulohazalarini bildirayotgan bo‘lsa, rasmiylar Rossiyada bo‘lib turgan O‘zbekiston fuqarolarini ogohlikka chaqirmoqda. Quyida ularni e’tiboringizga havola etamiz.
Jurnalist Muhrim A’zamxo‘jayev o‘zining Telegram-kanalida urush boshlanganda Rossiyaning bergan va’dasini eslatib (96 soatda butun Ukrainani bosib olish), 7 oydirki o‘sha 96 soat tugamayotgani, endilikda urush shamoli deyarli har bir rossiyalikning xonadoniga kirib borishiga ko‘p qolmagani, ular urushni propaganda telekanallari orqali emas, endi o‘z tanida his qilishni boshlashi haqida yozdi.
Jurnalist Shuhrat Latipov esa Rossiyada boshqa mamlakatlarga chiptalarni ommaviy ravishda sotib olish boshlangani, ko’plab shaharlarga hatto chiptalar qolmagani, narxlar 5–6 baravarga ko‘tarilib ketganiga to‘xtaldi.
“Qochmoqda, rossiyaliklar oyog‘ini qo‘lga olib qochmoqda”. Iqtisodchi Otabek Bakirov Shuhrat Latipovning biletlar qolmagani haqida yozgan postiga murojaat qilib, kechaning o‘zidayoq minglab hushyor rossiyaliklar qochishga ulgurgani, lekin bugun bilet topgan taqdirda ham ularning qochishga imkoniyati bor-yo‘qligi haqida yozmoqda.
Bloger Nurbek Alimov Putinning yadro qurolini ishlatishga sha’ma qilgani haqida post qoldirib, juda murakkab vaziyat yuzaga kelayotgani, bir haftadan keyin Ukraininaning Rossiya tomonidan bosib olingan hududlarida referendumlar o‘tkazilishi rejalashtirilgani, yangi dunyo o‘zining eng murakkab pallalarini boshidan kechirayotganini ta’kidladi.
Jamoatchilik faoli, adliya vaziri maslahatchisi Shahnoza Soatova esa Rossiyada safarbarlik e’lon qilingach, Toshkentda xuddi mart oyidagidek yana uylarning ijara narxi oshishi, banklarda odam ko‘payishi kuzatilishini taxmin qildi.
Jurnalist Aziza Qurbonova kecha hamma uxlamay kutgan Putin bayonotida Rossiyada “qisman” mobilizatsiya bugundanoq boshlanishi aytilgani, ammo, uning fikricha, Rossiyaning bugungi siyosatida “qisman” so‘zining sinonimi “to‘liq” degani ekanini bildirdi.
“Davletovuz”: “Odamlar Putinning urushi uchun jonini bermoqchi emas”.
O‘zbekiston Tashqi mehnat migratsiyasi agentligi Rossiyada bo‘lib turgan mamlakat fuqarolariga murojaat bilan chiqdi. Unda ommaviy namoyishlarda ishtirok etmaslik, Rossiya qonunlariga rioya etish va odamlar ko‘p to‘planayotgan joylarga bormaslik so‘ralgan.
Twitter'da nima gap?
Jurnalist Shuhrat Shokirjonov hozir o‘zbekistonlik migrantlar piyoda bo‘lsa ham yurtga qaytishi kerakligi, yo‘qsa, bir oylarda o‘zini Ukrainada okopning ichida ko‘rishi haqida yozdi.
Jurnalist Qahramon Aslanov esa yuqoridagi kabi mazmunda narsalar yozmaslik kerakligini ta’kidladi.
“Qaytishni targ‘ib qilish kerak, lekin bunaqa ohangdamas. Ijtimoiy tarmoqlarda Rossiyadagilarning ota-onasi, oila a’zolari bo‘lishi mumkin. Yomon ta’sir qiladi”, — deydi u.
Tadbirkor Hikmat Abdurahmonov esa urushga birinchi navbatda siyosiy rahbarlarning farzandlarini jo‘natish kerakligini aytmoqda.
“Shimoliy qo‘shnimiz urushga birinchi navbatda o‘z siyosiy rahbarlarining farzandlarini jo‘natishsa, ularning fidoyi va vatanparvarligini tezda tekshirib olishardi. Axir ular shunday ota-onalar farzandlari”, — deydi Abdurahmonov.
Mavzuga doir:
