“Sudya bosimlarga qarshi kurashishda o‘zi faol bo‘lishi kerak” — huquqshunos Saidali Muxtoraliyev bilan suhbat (video)

O‘zbekistonda sudga bosim o‘tkazganlik holati bo‘yicha yuritilgan jinoyat ishlari haqida ommada ma’lumot kam. Bu haqda huquqshunos Saidali Muxtoraliyev “Daryo” muxbiriga bergan intervyusida aytib o‘tdi.

Saidali Muxtorovning aytishicha, sudlar faoliyatiga noqonuniy aralashuvlar haqida ko‘p aytiladi, lekin unga huquqiy baho berilgan holatlar haqida jamoatchilikka juda kam ma’lumot beriladi.

“Sud ishlariga uchinchi shaxslar: ko‘proq davlat amaldorlari, turli xil mas’ul mansabdor shaxslar yoki muayyan bir kuchga ega bo‘lgan biznes vakillarining aralashuvi haqida gapiriladi. Lekin bularning birortasi bo‘yicha aniq faktlar, rasmiy ishlar yuritilgani yoki jinoyat ishi qo‘zg‘atilgani, qonuniy choralar ko‘rilgani haqidagi ma’lumotlarni ko‘rmaganmiz va xabarlarni eshitmaganmiz”, — dedi huquqshunos.

Uning alohida ta’kidlashicha, sudyalarning faoliyatiga noqonuniy aralashuvni to‘xtatish uchun jabrdiyda sudyaning o‘zi faol bo‘lishi kerak.

“Sudyaga mana bu ishni bunday mazmunda hal qilishingiz kerak, degan mazmunda bosim qilsa, o‘sha sudya aralashuv haqida rasmiy tarzda harakatini boshlashi kerak-da. Har qanday aralashuvni to‘xtatish uchun birinchi navbatda o‘sha sudyaning o‘zi faol bo‘lishi kerak. Chunki jabrdiyda u. Afsuski, amaliyotda biz biror-bir hokimni, biror-bir davlat amaldorini, biror-bir mansabdorni sudyalar faoliyatiga noqonuniy aralashganligi holati bo‘yicha aniq bir javobgarlikka tortilganlik faktini ko‘rmadik”, — dedi Saydali Muxtorov.

Huquqshunosning qo‘shimcha qilishicha, mutelik, ya’ni noqonuniy holatni shunchaki oddiy bir harakat sifatida, oddiy holat sifatida qabul qilishga o‘rganganlik holati sud tizimiga nisbatan ishonchsizlik ortib borishiga sabab bo‘lmoqda.