Yuqori inflyatsiya va Milliy sog‘liqni saqlash xizmati (NHS) tomonidan moliyalashtirish to‘xtatilgani Buyuk Britaniyada keyingi ikki yil ichida minglab dorixonalarning yopilishiga olib kelishi mumkin. Bu haqda “TASS” xabar berdi.
Inflyatsiyaning ta’siri bir necha ming dorixona yaqin orada yopilishini anglatadi. Ularning keskin qisqarishi NHS’dan dori-darmonlarni yetkazib berishning uzilishiga olib keladi va ambulatoriya sharoitida tibbiy xizmatlar ko‘rsatish tizimini kengaytirish istiqbollariga ta’sir qiladi, — deyiladi xabarda.
NHS tomonidan dorixonalar bilan tuziladigan shartnomalar sonining “o‘n yillik qisqarishi” va inflyatsiya darajasiga qarab moliyalashtirishni oshirishdan bosh tortishi natijasida sohadagi inqiroz rivojlanadi.
Qayd etilishicha, Buyuk Britaniya aholisining 85 foizi istiqomat qiluvchi Angliyada 2018-yildan beri 600 ga yaqin chakana dorixonalar (jami 5 foiz) yopilgan.
Hozirgi iqtisodiy inqiroz fonida bir qator dorixonalar ayrim xizmat turlaridan, xususan, dori vositalarini uyga yetkazib berishdan allaqachon voz kechgan.
Mavjud vaziyat Britaniya hukumatining NHS’ning surunkali muammolari nuqtai nazaridan sog‘liqni saqlash tizimida dorixonalar rolini oshirish dasturini shubha ostiga qo‘yadi.
Mart oyida Londonda joylashgan Iqtisodiyot va biznes tadqiqotlari markazi Buyuk Britaniya Yevropadagi energiya inqirozi natijasida 1950-yillardan beri turmush darajasining eng katta pasayishiga duch kelishi haqida ogohlantiruvchi hisobotni chop etdi.
Rasmiy ma’lumotlarga ko‘ra, avgust oyida qirollikdagi inflyatsiya o‘tgan yilning shu davriga nisbatan 9,9 foizni tashkil etgan. Angliya bankining so‘nggi hisob-kitoblariga ko‘ra, kuzda mamlakatda inflyatsiya darajasi 11 foizga yetishi mumkin.
Izoh (0)