Юқори инфляция ва Миллий соғлиқни сақлаш хизмати (NHS) томонидан молиялаштириш тўхтатилгани Буюк Британияда кейинги икки йил ичида минглаб дорихоналарнинг ёпилишига олиб келиши мумкин. Бу ҳақда «ТАСС» хабар берди.
Инфляциянинг таъсири бир неча минг дорихона яқин орада ёпилишини англатади. Уларнинг кескин қисқариши NHS’дан дори-дармонларни етказиб беришнинг узилишига олиб келади ва амбулатория шароитида тиббий хизматлар кўрсатиш тизимини кенгайтириш истиқболларига таъсир қилади, — дейилади хабарда.
NHS томонидан дорихоналар билан тузиладиган шартномалар сонининг «ўн йиллик қисқариши» ва инфляция даражасига қараб молиялаштиришни оширишдан бош тортиши натижасида соҳадаги инқироз ривожланади.
Қайд этилишича, Буюк Британия аҳолисининг 85 фоизи истиқомат қилувчи Англияда 2018 йилдан бери 600 га яқин чакана дорихоналар (жами 5 фоиз) ёпилган.
Ҳозирги иқтисодий инқироз фонида бир қатор дорихоналар айрим хизмат турларидан, хусусан, дори воситаларини уйга етказиб беришдан аллақачон воз кечган.
Мавжуд вазият Британия ҳукуматининг NHS’нинг сурункали муаммолари нуқтаи назаридан соғлиқни сақлаш тизимида дорихоналар ролини ошириш дастурини шубҳа остига қўяди.
Март ойида Лондонда жойлашган Иқтисодиёт ва бизнес тадқиқотлари маркази Буюк Британия Европадаги энергия инқирози натижасида 1950 йиллардан бери турмуш даражасининг энг катта пасайишига дуч келиши ҳақида огоҳлантирувчи ҳисоботни чоп этди.
Расмий маълумотларга кўра, август ойида қиролликдаги инфляция ўтган йилнинг шу даврига нисбатан 9,9 фоизни ташкил этган. Англия банкининг сўнгги ҳисоб-китобларига кўра, кузда мамлакатда инфляция даражаси 11 фоизга етиши мумкин.
Изоҳ (0)