O‘zbekiston va Qozog‘iston imkon qadar tezroq Xalqaro sanoat kooperatsiyasi markazini (XSKM) tashkil etish bo‘yicha kelishuvga erishdi. Bu haqda Investitsiyalar va tashqi savdo vazirligi matbuot xizmati ma’lum qildi.
Qayd etilishicha, bunday qaror O‘zbekiston Bosh vaziri o‘rinbosari, investitsiyalar va tashqi savdo vaziri Jamshid Xo‘jayev hamda Qozog‘iston Bosh vaziri o‘rinbosari, savdo va integratsiya vaziri Serik Jumangarin boshchiligidagi delegatsiyalarning muzokaralari chog‘ida qabul qilingan.
Xususan, sanoat kooperatsiyasini rivojlantirish masalalari ko‘rib chiqildi. Xalqaro sanoat kooperatsiyasi markazining (XSKM) tashqi va ichki infratuzilmasini tashkil etish bo‘yicha loyiha-smeta hujjatlarini, shuningdek, XSKM faoliyatini tartibga soluvchi tegishli hukumatlararo bitimni qisqa muddatda ishlab chiqishga kelishildi, — deyiladi xabarda.
Tomonlar, shuningdek, avtomobilsozlik, fosforli va murakkab mineral o‘g‘itlar ishlab chiqarish, elektrotexnika sanoatida qo‘shma loyihalarni amalga oshirish imkoniyatlarini ko‘rib chiqdi.
Bundan tashqari farmatsevtika mahsulotlari ishlab chiqarish va qishloq xo‘jaligida o‘zaro hamkorlik masalalarini muhokama qildi.
Dori vositalarini ro‘yxatga olishni soddalashtirish va qishloq xo‘jaligi mahsulotlarini yetkazib berish bo‘yicha forvard shartnomalarini tuzgan holda birgalikda ishlab chiqarishni tashkil etish bo‘yicha kelishuvga erishildi.
Muzokaralar chog‘ida transport-logistika sohasidagi hamkorlikni rivojlantirish istiqbollari, jumladan, temiryo‘l va avtomobil yo‘nalishlarini diversifikatsiya qilish hamda ikki davlat o‘rtasidagi aviaqatnovlar sonini oshirish masalalari tahlil qilindi.
Avvalroq O‘zbekiston Markaziy Osiyodagi qaysi davlatlar bilan eng ko‘p savdo qilishi ma’lum bo‘lgan edi.
Izoh (0)