«Тарбиячи ва ўқитувчиларни тиббий кўрикдан ўтказишда пул талаб қилиш ҳолатлари ҳақида мурожаатлар бўляпти» – Расул Кушербаев

Олий Мажлис Қонунчилик палатаси депутати Расул Кушербаевнинг маълум қилишича, ўқитувчи ва мактабгача таълим муассасалари тарбиячилари бепул тиббий кўрикдан бепул ўтишлари мумкин бўлса-да, жойларда кўрикни пуллик ташкил қилиш ҳолати ҳақида мурожаатлар бўляпти.

Расул Кушербаевнинг алоҳида таъкидлашича, Меҳнат кодексининг 214-моддаси ҳамда «Меҳнатни муҳофаза қилиш тўғрисида»ги қонуннинг 24-моддасига асосан тиббий кўриклардан ўтилиши муносабати билан ходимлар чиқимдор бўлмайдилар.

«Яъни мажбурий тиббий кўриклар ходимлар, шу жумладан, ўқитувчи ва тарбиячи ходимларнинг ўз ҳисобларидан амалга оширилиши мумкин эмас. Агар иш берувчи ходим ўз ҳисобидан тиббий кўрикдан ўтишини талаб қилса, ушбу ходим меҳнат органи, прокуратура ёки касаба уюшмаларига мурожаат қилиши керак», – деди депутат.

Унинг айтишича, Соғлиқни сақлаш вазирлигидан ҳар бир ҳудуд бўйича вилоят бошқармалари, туман соғлиқни сақлаш бўлимларига топшириқлар берилган.

«Шунга қарамай жойларда тиббий кўрикни пуллик ташкил қилиш бўйича талаб қилиш ҳолатлари учраб турганлиги ҳақида мурожаатлар бўляпти. Ҳурматли тарбиячилар ва ўқитувчилар, билиб қўйингизлар! Агар шундай ҳолат бўладиган бўлса, сиз зудлик билан тегишли вилоят соғлиқни сақлаш бошқармасига бу ҳақда хабар беринг ва уларнинг ишонч алоқа телефонларига боғланинг. Улар бу бўйича қонуний чорани кўришни ўз бўйнига олишган. Яна бир бор эслатиб ўтмоқчимиз. Ҳурматли тарбиячилар, педагоглар ва ўқитувчилар, сизлар бепул тиббий кўрикдан ўтиш ҳуқуқига эгаси ва бу бўйича Соғлиқни сақлаш вазирлиги томонидан тегишли чоралар амалга оширилмоқда. Марҳамат, бу ҳуқуқдан фойдаланинг», – Расул Кушербаев.

Меҳнат кодексининг 214-моддасига кўра, умумтаълим мактаблари, мактабгача таълим ташкилотлари ва бошқа муассасаларнинг бевосита болаларга таълим ёки тарбия бериш билан машғул бўлган педагог ва бошқа ходимлари тиббий кўрикдан ўтказишни ташкил қилиши шарт.

Меҳнат шароити ноқулай ишлар ва бажарилаётганида дастлабки тарзда ва вақти-вақти билан тиббий кўрикдан ўтилиши лозим бўлган бошқа ишларнинг рўйхати ва уларни ўтказиш тартиби Ўзбекистон республикаси Соғлиқни сақлаш вазирлиги томонидан белгиланади.

Тиббий кўриклардан ўтилиши муносабати билан ходимлар чиқимдор бўлмайдилар.