Narxi 16 ming dollar, vazni 200 kilogrammdan oshadi – “Naslli qo‘chqorlar ko‘rgazmasi”dan reportaj

Toshkent viloyatida 25-sentabr kuni bo‘lib o‘tgan “Naslli qo‘chqorlar ko‘rgazmasi”da 16 ming dollarga sotilgan qo‘y ko‘rgazmaga qo‘yildi.

Toshkent viloyatining Zangiota tumanida joylashgan “Nur” zamonaviy qo‘ychilik majmuasida Veterinariya va chorvachilikni rivojlantirish davlat qo‘mitasi tomonidan tashkil etilgan ko‘rgazmada tadbirkor Ramin Mirzoyev uch bosh naslli qo‘yi bilan ishtirok etdi.

“Toshkent viloyatining Olmaliq shaharidan keldik. Qo‘ylarimiz orasida “Grizi” laqabli qo‘chqor mashhur. Bu qo‘chqor Qirg‘izistondan keltirilgan, edilboy zotiga mansub. Biz farg‘onalik qo‘yboqardan to‘rt oy oldin 16 ming dollarga sotib olganmiz”, – dedi Ramin Mirzoyev.

Uning qo‘shimcha qilishicha, hozir qo‘chqorning vazni 165 kilogramm atrofida, agar rejali boqilsa, tirik vazni 200 kilogrammdan ortishi mumkin.

Avvalroq ushbu ko‘rgazmada Pokistondan har biri ming dollardan olib kelingan kayla dumba zotli qo‘ylar namoyish qilingani haqida xabar berilgandi.