Нархи 16 минг доллар, вазни 200 килограммдан ошади – «Наслли қўчқорлар кўргазмаси»дан репортаж

Тошкент вилоятида 25 сентябрь куни бўлиб ўтган «Наслли қўчқорлар кўргазмаси»да 16 минг долларга сотилган қўй кўргазмага қўйилди.

Тошкент вилоятининг Зангиота туманида жойлашган «Нур» замонавий қўйчилик мажмуасида Ветеринария ва чорвачиликни ривожлантириш давлат қўмитаси томонидан ташкил этилган кўргазмада тадбиркор Рамин Мирзоев уч бош наслли қўйи билан иштирок этди.

«Тошкент вилоятининг Олмалиқ шаҳаридан келдик. Қўйларимиз орасида «Гризи» лақабли қўчқор машҳур. Бу қўчқор Қирғизистондан келтирилган, эдилбой зотига мансуб. Биз фарғоналик қўйбоқардан тўрт ой олдин 16 минг долларга сотиб олганмиз», – деди Рамин Мирзоев.

Унинг қўшимча қилишича, ҳозир қўчқорнинг вазни 165 килограмм атрофида, агар режали боқилса, тирик вазни 200 килограммдан ортиши мумкин.

Аввалроқ ушбу кўргазмада Покистондан ҳар бири минг доллардан олиб келинган кайла думба зотли қўйлар намойиш қилингани ҳақида хабар берилганди.