“O‘zbekiston temir yo‘llari” bir nechta jahon kompaniyalaridan elektropoyezdlar hamda zamonaviy yo‘lovchi vagonlari xarid qilishi kutilmoqda. Bu haqda jamiyat matbuot xizmati xabar berdi.
Qayd etilishicha, O‘zbekistonning ichki va tashqi turizm salohiyatini yanada oshirish chora-tadbirlari yuzasidan 19-sentabr kuni Shavkat Mirziyoyev raisligida o‘tkazilgan videoselektor yig‘ilishida temiryo‘l tarmog‘iga oid berilgan topshiriqlar ijrosini ta’minlash, xorijlik mutaxassislar bilan tajriba almashish, ishlab chiqaruvchilar bilan yaqin aloqalar o‘rnatish maqsadida “O‘zbekiston temir yo‘llari” boshqaruv raisi vazifasini bajaruvchi Xusnutdin Xasilov boshchiligidagi delegatsiya Germaniyaning Berlin shahrida o‘z ishini boshlagan InnoTrans-2022 Transport texnologiyalari xalqaro savdo yarmarkasiga tashrif buyurdi.
Mavzuga doir: “O‘zbekiston temir yo‘llari” raisi 3 oyda tizimida o‘zgarish qilmasa, ishdan olinadi
Mazkur tadbirda qatnashayotgan delegatsiya a’zolari, Fransiyaning Alstom, Germaniyaning Siemens, Ispaniyaning SAF, Shveysariya Stadler, Chexiyaning Scoda, Janubiy Koreyaning Hyundai kabi dunyoning yetakchi kompaniyalari bilan yangi elektropoyezdlar hamda zamonaviy yo‘lovchi vagonlarni xarid qilish bo‘yicha muzokaralar olib bordi.
Shu kuni O‘zbekiston transport vazirligi, “O‘zbekiston temir yo‘llari” AJ, Germaniyaning KFV taraqqiyot banki hamda Deutsche Bahn AG kompaniyalari ishtirokida to‘rt tomonlama memorandum imzolangan.
Shundan so‘ng delegatsiya a’zolari dunyoning yetakchi kompaniyalari, jumladan, Polshaning poyezdlar, vagonlar, tramvaylar ishlab chiqarishga ixtisoslashgan Pesa konserni hamda temiryo‘l transportini ishlab chiqarish bo‘yicha jahon bozorining qariyb yarmini egallab kelayotgan Xitoyning CRRC Corporation Limited korporatsiyasi vakillari bilan uchrashuvlar o‘tkazgan.
Uchrashuvlar natijasiga ko‘ra Respublikaning barcha viloyatlari orqali to‘laqonli temiryo‘l qatnovlarini ta’minlash uchun 34 ta elektropoyezd, 6 ta dizel poyezdi hamda kamida 100 ta yangi zamonaviy turdagi yo‘lovchi vagonlarni xarid qilish mo‘ljallangan.
Mavzuga doir: O‘zbekistonda yil oxirigacha yo‘lovchi vagonlarning bir qismi kapital ta’mirdan so‘ng yangilanadi
Izoh (0)