«Ўзбекистон темир йўллари» бир нечта жаҳон компанияларидан электропоездлар ҳамда замонавий йўловчи вагонлари харид қилиши кутилмоқда. Бу ҳақда жамият матбуот хизмати хабар берди.
Қайд этилишича, Ўзбекистоннинг ички ва ташқи туризм салоҳиятини янада ошириш чора-тадбирлари юзасидан 19 сентябрь куни Шавкат Мирзиёев раислигида ўтказилган видеоселектор йиғилишида темир йўл тармоғига оид берилган топшириқлар ижросини таъминлаш, хорижлик мутахассислар билан тажриба алмашиш, ишлаб чиқарувчилар билан яқин алоқалар ўрнатиш мақсадида «Ўзбекистон темир йўллари» бошқарув раиси вазифасини бажарувчи Хуснутдин Хасилов бошчилигидаги делегация Германиянинг Берлин шаҳрида ўз ишини бошлаган ИнноТранс-2022 Транспорт технологиялари халқаро савдо ярмаркасига ташриф буюрди.
Мавзуга доир: «Ўзбекистон темир йўллари» раиси 3 ойда тизимида ўзгариш қилмаса, ишдан олинади
Мазкур тадбирда қатнашаётган делегация аъзолари, Франциянинг Alstom, Германиянинг Siemens, Испаниянинг САФ, Швейцария Stadler, Чехиянинг Scoda, Жанубий Кореянинг Hyundai каби дунёнинг етакчи компаниялари билан янги электропоездлар ҳамда замонавий йўловчи вагонларни харид қилиш бўйича музокаралар олиб борди.
Шу куни Ўзбекистон транспорт вазирлиги, «Ўзбекистон темир йўллари» АЖ, Германиянинг КФВ тараққиёт банки ҳамда Deutsche Bahn АГ компаниялари иштирокида тўрт томонлама меморандум имзоланган.
Шундан сўнг делегация аъзолари дунёнинг етакчи компаниялари, жумладан, Польшанинг поездлар, вагонлар, трамвайлар ишлаб чиқаришга ихтисослашган Песа концерни ҳамда темир йўл транспортини ишлаб чиқариш бўйича жаҳон бозорининг қарийб ярмини эгаллаб келаётган Хитойнинг CРРC Corporation Limited корпорацияси вакиллари билан учрашувлар ўтказган.
Учрашувлар натижасига кўра Республиканинг барча вилоятлари орқали тўлақонли темир йўл қатновларини таъминлаш учун 34 та электропоезд, 6 та дизель поезди ҳамда камида 100 та янги замонавий турдаги йўловчи вагонларни харид қилиш мўлжалланган.
Мавзуга доир: Ўзбекистонда йил охиригача йўловчи вагонларнинг бир қисми капитал таъмирдан сўнг янгиланади
Изоҳ (0)