AOKAda o‘tkazilgan brifingda Xorijiy tillarni o‘rganishni ommalashtirish agentligi direktori o‘rinbosari Azimjon Husanov sohaga oid rejalar haqida ma’lumot berdi.
Qayd etilishicha, 2022-yil 1-oktabrdan boshlab qishloq hududlarida xorijiy tillarni o‘qitish faoliyatini tashkil etish uchun nodavlat ta’lim tashkilotlariga mahalliy budjet mablag‘lari hisobidan bir martalik subsidiya ajratish bo‘yicha davlat xizmatlari ko‘rsatishning ma’muriy reglamenti amalga kiritilmoqda.
50 million so‘mgacha bo‘lgan bir martalik subsidiyalar tadbirkorlik subyekti bo‘lgan nodavlat ta’lim tashkilotlariga kamida 6 oy muddat davomida qishloq hududlarida xorijiy tillarni o‘qitish faoliyati bilan shug‘ullanish sharti bilan ajratiladi.
Nodavlat ta’lim tashkiloti tomonidan mahalliy budjet mablag‘lari hisobidan subsidiya ajratish bo‘yicha O‘zbekiston Respublikasi Yagona interaktiv davlat xizmatlari portali orqali murojaat qilish mumkin bo‘ladi.
Manfaatdor davlat organlari va tashkilotlari tomonidan taqdim etilgan ma’lumotlarni baholash orqali Qoraqalpog‘iston Respublikasi Vazirlar Kengashi raisi va viloyatlar hokimlarining qarori asosida har chorakda subsidiya ajratadi.
Nodavlat ta’lim tashkilotlariga baholash mezonlari asosida to‘plangan ballarga mutanosib ravishda Moliya vazirligi g‘aznachiligining hududiy boshqarmalari tomonidan 50 million so‘mgacha subsidiya ajratib borish belgilangan.
Qoraqalpog‘iston Respublikasi Vazirlar Kengashi va viloyatlar hokimliklari Vazirlar Mahkamasi huzuridagi Xorijiy tillarni o‘rganishni ommalashtirish agentligi bilan birgalikda xorijiy tillarni o‘qitish faoliyatini tashkil etish uchun nodavlat ta’lim tashkilotlariga mahalliy budjet mablag‘lari hisobidan bir martalik subsidiya ajratiladigan qishloq hududlari ro‘yxatini shakllantiradi va tasdiqlaydi.
Bunda qishloq hududlari ro‘yxatiga har yili bir marta o‘zgartirish va qo‘shimchalar kiritish mumkin bo‘ladi.
Adliya vazirligi tomonidan davlat organlari va boshqa tashkilotlar tomonidan davlat xizmatlari ko‘rsatilishining belgilangan tartibiga rioya etilishi bo‘yicha ularning faoliyati yuzasidan doimiy nazorat o‘rnatiladi.
Izoh (0)