AQSH Mudofaa vazirligi Ukraina uchun uzoq masofali Switchblade 600 dronlarini ishlab chiqarish bo‘yicha AeroVironment kompaniyasi bilan 2,2 million dollarlik shartnoma imzoladi. Bu haqda Pentagon saytida e’lon qilingan.
Xabarga ko‘ra, shartnoma 15-sentabr kuni tuzilgan. Switchblade 600 kamikadze dronlari Ukraine Security Assistance Initiative (USAI) dasturi doirasida yetkazib beriladi. Dastur shartlariga ko‘ra, Pentagon kompaniyalar bilan qurol ishlab chiqarish bo‘yicha shartnomalar tuzadi, shundan so‘ng qurollar Ukrainaga o‘tkaziladi.
AQSH Mudofaa vazirligining qo‘shimcha qilishicha, USAI doirasida jami 1,2 milliard dollarlik shartnomalar tuzilgan va AQSH Kongressi ushbu dastur uchun jami 6 milliard dollar ajratgan.
16-sentabr kuni AQSH prezidenti Jo Bayden Ukrainaga 600 million dollar miqdorida qo‘shimcha harbiy yordam taqdim etishni buyurgandi. Ushbu mablag‘lar mudofaa mahsulotlari va Mudofaa vazirligi xizmatlari, shuningdek, ukrainalik harbiy xizmatchilarni harbiy jihatdan tayyorlash va o‘qitishga mo‘ljallangan.
Izoh (0)