“Ukrainadagi urushda 5937 nafar rossiyalik harbiy halok bo‘ldi” — Sergey Shoygu (video)

Ukrainadagi urush paytida 5937 nafar rossiyalik harbiy halok bo‘lgan. Bu haqda Rossiya mudofaa vaziri Sergey Shoygu bayonot berdi.

Bugun biz Ukraina bilan emas, balki kollektiv G‘arb bilan urishmoqdamiz. NATOning barcha sun’iy yo‘ldoshlari bizga qarshi ishlamoqda.

Rossiya qurollarining hammasi, shu jumladan, yadroviy triada o‘z vazifalarini bajarmoqda. Ukrainaning yo‘qotishlari — 100 mingdan ortiq, 61 ming odam o‘lgan. Bu mamlakat armiyasining yarmiga teng.

Rossiyadan esa harbiy harakatlar davomida 5937 nafar askar halok bo‘ldi — dedi Shoygu.

Avval Rossiya Mudofaa vazirligi jangovar harakatlar davrida Rossiya armiyasining yo‘qotishlari haqida atigi ikki marta rasmiy xabar bergan edi. 2-mart kuni vazirlik 498 kishi halok bo‘lgani va 1597 kishi yaralangani, 25-mart kuni esa 1351 kishi halok bo‘lgani va 3825 kishi yaralangani haqida ma’lumot bergan.

Rossiya prezidenti Vladimir Putin Rossiyada qisman safarbarlik e’lon qildi. Safarbarlik tadbirlari bugun, 21-sentabr kuni boshlanadi. Mudofaa vazirligi rahbarining so‘zlariga ko‘ra, Rossiyada katta safarbarlik resursi qariyb 25 million kishini tashkil etadi, shundan 1 foizdan ko‘prog‘i —  300 ming kishi qisman safarbarlikka tortiladi.

Talabalar va shartnoma asosida harbiy xizmat o‘tovchilarni urushga safarbar qilish haqida gap yo‘q, deya qo‘shimcha qildi Shoygu.