Ukraina prezidentining rafiqasi Yelena Zelenskaya BMT Bosh Assambleyasining 77-sessiyasiga yetib keldi va tashkilot bosh kotibi Antoniu Guterrish bilan uchrashdi, deb xabar bermoqda BMT matbuot xizmati.
“Birinchi xonim urushdan jabr ko‘rgan ukrainalik ayollar va bolalarni himoya qilish muhimligi haqida gapirdi”, — deyiladi xabarda.
BMT bosh kotibi bilan uchrashuvda bosh vazir Denis Shmigal ham qatnashdi. Ular harbiy harakatlarning gumanitar vaziyatga ta’sirini, inson huquqlarini va yadro xavfsizligini muhokama qildi.
Guterrish BMT tomonidan Ukrainaga to‘liq gumanitar ko‘mak berilishini aytdi va mamlakat vakillariga don bitimidagi ishtiroki uchun minnatdorlik bildirdi.
BMT Bosh Assambleyasi 77-sessiyasi Nyu-Yorkda 20-sentabr kuni boshlangan bo‘lib, 26-sanagacha davom etadi.
Eslatib o‘tamiz, sessiya boshlanishidan sal avvalroq Ukraina vakilligi Zelenskiyga yig‘ilishda masofadan turib nutq so‘zlash imkonini berishni, aniqrog‘i, uning nutqidan iborat videoyozuvni namoyish qilishni so‘ragandi. Ukraina missiyasi buni prezident harbiy harakatlar tufayli sessiyada shaxsan ishtirok eta olmasligi bilan izohlagandi. Ko‘pchilik mamlakatlar bunday taklifni qo‘llab-quvvatladi.
Izoh (0)