Jo Bayden Kiyevga yana 600 mln dollarlik harbiy yordam ajratishni topshirdi

AQSH prezidenti Jo Bayden Ukrainaga 600 million dollar miqdorida qo‘shimcha harbiy yordam taqdim etishni topshirdi, deb yozadi “RBK”.

Ushbu mablag‘lar mudofaa mahsulotlari va Mudofaa vazirligi xizmatlari, shuningdek, ukrainalik harbiy xizmatchilarni harbiy jihatdan tayyorlash va o‘qitishga mo‘ljallangan.

Pentagon xabar berishicha, AQSHning Ukrainaga yangi yordam paketiga HIMARS baravar o‘tish ochish reaktiv tizimlari uchun qo‘shimcha snaryadlar, 105 millimetrli artilleriya qurol-yarog‘i uchun 36 mingta o‘q-dorilar, 1000 ta yuqori aniqlikdagi 155 millimetrli artilleriya snaryadlari va to‘rtta artilleriyaga qarshi radarlar kiradi.

Bundan tashqari, Ukrainaga og‘ir texnikani tashish uchun to‘rtta yuk mashinasi va sakkizta tirkama, dronga qarshi havo tizimlari, minalardan tozalash uchun qurilma, Claymore piyoda qo‘shinlarga qarshi minalar, portlovchi zaryadlar, o‘qotar qurollar va o‘q-dorilar, tungi ko‘rish uskunalari yetkazib beriladi.

Prezident Jo Bayden hokimiyat tepasiga kelganidan buyon AQSH Kiyevga jami 15,8 milliard dollarlik harbiy yordam taqdim etdi. Ukraina harbiy ehtiyojlari uchun 2014-yildan buyon 17,9 milliard, Rossiya harbiy operatsiyasi boshlanganidan buyon esa 15,1 milliard dollar ko‘mak olgan.

7-sentabr kuni Ukraina Qurolli kuchlari bosh qo‘mondoni general Valeriy Zalujniy va Oliy rada mudofaa qo‘mitasi boshlig‘i o‘rinbosari general-leytenant Mixail Zabrodskiy e’lon qilgan maqolada Ukrainaga urushning borishini o‘zgartirish uchun uzoq masofali qurol-yarog‘, shu jumladan, ATACMS zarurligi aytilgandi.

Keyinroq Ukraina hukumati AQSHdan qo‘shimcha qurol-yarog‘, shu jumladan, uzoq masofali raketa tizimlari yetkazib berishni so‘radi. Ukraina hukumati Amerika kongressmenlariga yo‘llagan hujjatda 29 turdagi qurol-yarog‘ tizimlari va o‘q-dorilar keltirilgan bo‘lib, Kiyevning so‘zlariga ko‘ra, “2023-yilda hujumni davom ettirish” uchun u shularga ehtiyoj sezadi.

Avvalroq amerikaliklar 2022-yilning fevral oyidan beri Ukraina Qurolli kuchlarining 1475 nafar askarini AQSH tomonidan Ukrainaga yetkazib berilgan qurollardan foydalanishga o‘rgatgani xabar berilgandi.