Turkmanistonda haydovchilik guvohnomasini olmoqchi yoki almashtirmoqchi bo‘lgan ayollarga nisbatan diskriminatsiyaning navbatdagi to‘lqini davom etmoqda, deb yozadi “Xronika Turkmenistana”.
Nashr manbalariga ko‘ra, Ichki ishlar vazirligi mutasaddilari 40 yoshga to‘lmagan ayollarga mashina sotib olish va uni o‘z nomiga rasmiylashtirishni taqiqlash to‘g‘risidagi yashirin buyruqqa amal qilmoqda.
Ashxoboddagi haydovchilik guvohnomalarini beradigan va almashtiradigan politsiya bo‘limida 35 yoshgacha bo‘lgan ayollar uchun to‘siqlar yaratilmoqda, deb yozadi gazeta. Bunday ayollar guvohnomalarni almashtirishda ota-onalarining (yoki boshqa qarindoshlarining) avtomashinaga egalik qilishi to‘g‘risidagi hujjatlarni hamda ulardan avtomashinani boshqarish uchun ishonchnomani taqdim etishi kerak, chunki politsiyaning fikriga ko‘ra, ayollarning o‘zlari avtomashinaga egalik qilish huquqiga ega emas. Ammo barcha kerakli hujjatlarni taqdim etilgandan keyin ham yangi guvohnoma berish jarayoni juda uzoq davom etishi mumkin.
Shu bilan birga, 40 yoshga to‘lmagan ayollar qariyb 5000 dollar evaziga haydovchilik guvohnomasini olish yoki yangilash, shuningdek, transport vositasini o‘z nomiga rasmiylashtirishga muvaffaq bo‘lgan holatlar ham uchramoqda.
Turkmanistonda vaqti-vaqti bilan ayollarga haydovchilik guvohnomalarini berish va uzaytirishga yashirin taqiq qo‘yiladi. Turkmenportal ma’lumotlariga ko‘ra, 2021-yilda butun Turkmaniston bo‘ylab 27 mingdan ortiq kishi haydovchilik kurslarida qatnashgan. Ammo ularning qanchasi ayollar bo‘lgani noma’lum.
Izoh (0)