“Hozir bunday istiqbollar ko‘rinmayapti”. Peskov — urushni diplomatiya yo‘li bilan tugatish ehtimoli haqida

Rossiya prezidenti matbuot kotibi Dmitriy Peskovning aytishicha, Kreml hozirda Ukrainadagi urushni “siyosiy va diplomatik yo‘llar bilan” tugatish imkoniyatini ko‘rmayapti.

“Hozirda bunday istiqbollar ko‘rinmayapti”, — degan Peskov “Interfaks”ga.

Sentabr o‘rtalarida Samarqandda bo‘lib o‘tgan Shanxay hamkorlik tashkiloti sammitida Rossiya prezidenti Vladimir Putin Hindiston bosh vaziri Narendra Modi bilan uchrashuvda Rossiya Ukraina bilan urushni imkon qadar tezroq to‘xtatish uchun hamma narsani qilishga tayyorligini, biroq Kiyev muzokaradan bosh tortayotganini aytgan.

SHHT sammitida Putin bilan uchrashgan Turkiya prezidenti Rajab Toyyib Erdo‘g‘on ham Rossiya prezidenti urushni imkon qadar tezroq tugatish tarafdori ekanini ma’lum qildi. Turkiya rasmiylari Ukraina va Rossiya prezidentlari o‘rtasida uchrashuvlar tashkil etishga tayyor ekanini bir necha bor ta’kidlagan. Ukraina prezidenti ofisi rahbari maslahatchisi Mixail Podolyakning aytishicha, Zelenskiy va Putin o‘rtasidagi muzokaralar faqat kelajakda bo‘lib o‘tishi va unda Rossiya tomonining bosqin uchun to‘lashi kerak bo‘lgan tovon miqdori muhokama qilinishi mumkin.