Toshkent davlat iqtisodiyot universiteti rektori Qo‘ng‘irotboy Sharipov “Daryo” nashriga bergan intervyusida jamiyatdagi tanish-bilishchilik illati to‘g‘risida gapirdi.
Qo‘ng‘irotboy Sharipovning aytishicha, tanish-bilishchilik mentalitetga singib ketgan va undan qutilish qiyin masala.
“Bizdagi eng yomon illatlardan biri – tanish-bilishchilik. Masalan, falonchani o‘g‘li yoki qizi deyilsa, baho qo‘yib beramiz. Bu haligacha bor. Aytish kerakki, bu jamiyatni buzadigan ishlardan bittasi.
Nafaqat tanish-bilishchilik, balki mentalitetimizga singib ketgan ko‘plab illatlarni yo‘qotish juda og‘ir deb o‘ylayman. Urf-odatimiz shunaqaki, birovni oshiga boramiz yoki mehmoni bo‘lamiz, keyin farzandini bahosini qo‘yib bermasa, u xafa bo‘ladi.
Afsus, bizda shunday odat shakllanib qolgan. Chet elda birov boshqanikiga mehmonga bormaydi. Agar borsa ham yegan narsasiga o‘zi yonidan pul to‘laydi. Biz yeb qo‘ygandan keyin tilimiz qisiq bo‘ladi.
Oldin o‘zimizning mentalitetimizni to‘g‘rilashimiz kerak. Bilasizmi, eng yomoni bu illatlar barcha postsovet davlatlarida bor. Rossiyada ham hammasi huddi shunaqa. Men u yerda o‘qiganman. Qozog‘iston, Ozarbayjonda ham shunday”,– dedi universitet rahbari.
Qo‘ng‘irotboy Sharipov tizimning ishlashi rahbarga bog‘liqligi borasida ham o‘z mulohazalarini bildirdi.
“Hammasi tizimni boshqarayotgan rahbarga bog‘liq. Agar rahbar shuni tushunib, oxirigacha yetkazsa, unda barchaga yaxshi yetib boradi. Kommunistik tizim hammamizni “buzgan”. Janubiy va Shimoliy Koreya davlatlarini olaylik, Janubiy Koreya hozir qanaqa rivojlanib ketgan–dunyodagi kuchli rivojlangan davlatlar o‘ntaligida turibdi. Shimoliy Koreya esa dunyodagi eng qoloq davlatlar o‘ntaligida. Hamma gap tizimda.
Sovet tizimi miyamizga o‘tirib qolgan, undan qutilishimizga hali ancha bor. Masalan, tizimda biror narsani o‘zgartiraman desam, qolganlar meni yomon qabul qiladi. Bir g‘alati voqea bo‘lgandi. O‘zim Turin universitetida rektor bo‘lib ishlagan paytimda o‘g‘lim o‘qishni bitira olmay, 2 yil qayta va qayta o‘qidi. U 4 yillik bakalavr yo‘nalishini 6 yil deganda bitirdi. Atrofimdagi hamma ustimdan kuldi. Rektor ham shunaqa bo‘ladimi, o‘z o‘g‘lini bitirishiga yordam bera olmaydi, deyishdi. Lekin u yerda tizim shakllanganki, xohlasangiz ham o‘qimagan talabaga baho olishida hech qanday yordam bera olmaysiz. O‘qimasa foydasi yo‘q, uni bahosi qo‘yib berilmaydi”, – dedi rektor.
Avvalroq saytimizda Qo‘ng‘irotboy Sharipov bilan suhbatning to‘liq shakli e’lon qilingandi.
Izoh (0)