«Турин университетида ректорлик пайтим ўғлим ўқишни икки йил битира олмай қайта ўқиди, ўшанда ҳамма устимдан кулди»– Қўнғиротбой Шарипов таниш-билишчилик иллати ҳақида

Тошкент давлат иқтисодиёт университети ректори Қўнғиротбой Шарипов «Дарё» нашрига берган интервьюсида жамиятдаги таниш-билишчилик иллати тўғрисида гапирди.

Қўнғиротбой Шариповнинг айтишича, таниш-билишчилик менталитетга сингиб кетган ва ундан қутилиш қийин масала.

«Биздаги энг ёмон иллатлардан бири – таниш-билишчилик. Масалан, фалончани ўғли ёки қизи дейилса, баҳо қўйиб берамиз. Бу ҳалигача бор. Айтиш керакки, бу жамиятни бузадиган ишлардан биттаси.

Нафақат таниш-билишчилик, балки менталитетимизга сингиб кетган кўплаб иллатларни йўқотиш жуда оғир деб ўйлайман. Урф-одатимиз шунақаки, бировни ошига борамиз ёки меҳмони бўламиз, кейин фарзандини баҳосини қўйиб бермаса, у хафа бўлади.

Афсус, бизда шундай одат шаклланиб қолган. Чет элда биров бошқаникига меҳмонга бормайди. Агар борса ҳам еган нарсасига ўзи ёнидан пул тўлайди. Биз еб қўйгандан кейин тилимиз қисиқ бўлади.

Олдин ўзимизнинг менталитетимизни тўғрилашимиз керак. Биласизми, энг ёмони бу иллатлар барча постсовет давлатларида бор. Россияда ҳам ҳаммаси ҳудди шунақа. Мен у ерда ўқиганман. Қозоғистон, Озарбайжонда ҳам шундай»,– деди университет раҳбари.

Қўнғиротбой Шарипов тизимнинг ишлаши раҳбарга боғлиқлиги борасида ҳам ўз мулоҳазаларини билдирди.

«Ҳаммаси тизимни бошқараётган раҳбарга боғлиқ. Агар раҳбар шуни тушуниб, охиригача етказса, унда барчага яхши етиб боради. Коммунистик тизим ҳаммамизни «бузган». Жанубий ва Шимолий Корея давлатларини олайлик, Жанубий Корея ҳозир қанақа ривожланиб кетган–дунёдаги кучли ривожланган давлатлар ўнталигида турибди. Шимолий Корея эса дунёдаги энг қолоқ давлатлар ўнталигида. Ҳамма гап тизимда.

Совет тизими миямизга ўтириб қолган, ундан қутилишимизга ҳали анча бор. Масалан, тизимда бирор нарсани ўзгартираман десам, қолганлар мени ёмон қабул қилади. Бир ғалати воқеа бўлганди. Ўзим Турин университетида ректор бўлиб ишлаган пайтимда ўғлим ўқишни битира олмай, 2 йил қайта ва қайта ўқиди. У 4 йиллик бакалавр йўналишини 6 йил деганда битирди. Атрофимдаги ҳамма устимдан кулди. Ректор ҳам шунақа бўладими, ўз ўғлини битиришига ёрдам бера олмайди, дейишди. Лекин у ерда тизим шаклланганки, хоҳласангиз ҳам ўқимаган талабага баҳо олишида ҳеч қандай ёрдам бера олмайсиз. Ўқимаса фойдаси йўқ, уни баҳоси қўйиб берилмайди», – деди ректор.

Аввалроқ сайтимизда Қўнғиротбой Шарипов билан суҳбатнинг тўлиқ шакли эълон қилинганди.