Беларусь ўз ҳудуди орқали Россия армиясига яширинча зарба берилишига йўл қўймайди, бу ҳақда республика президенти Александр Лукашенко Беларусь Хавфсизлик кенгаши давлат котиби Александр Вольфович билан учрашувда айтиб ўтди, деб ёзади «РБК».
«Россияни қўллаб-қувватлашга келсак, яна бир марта такрорлайман: Беларусь ҳудуди орқали Россия қўшинларига орқадан ҳам, ён томондан ҳам, ёнбошдан ҳам ҳеч қанақа зарба берилиши керак эмас. Ва бундай бўлмайди ҳам. Бу бизнинг ўз иттифоқдошимиз қаршисидаги бурчимиздир», — деди Лукашенко.
У, шунингдек, Вольфовичдан Беларусь жанубий чегарасидаги вазият ҳақида қисқача маълумот беришни сўради. «У ерда қарши туриш бўйича муайян тажрибамиз бор эди, шу жумладан, батальон тактик гуруҳлар тузиш, чегарани ёпиш бўйича ҳам. Ҳозир вазият қанақа ва бундан буён у ерда қандай ҳаракат қиламиз», — дея сўради Беларусь президенти.
Худди шундай саволни у шимоли-ғарбий чегара ҳимояси бўйича ҳам берди. «У ерда реал хавфлар мавжуд. Албатта. Бу бизнинг армиямиз учун асосийси. Яна айтаман, бизни Украинада жанг қилмоқчи деб айблаш керак эмас. Биз ўз Ватанимизни ҳимоя қилишимиз керак», — деди Лукашенко.
Беларусь шимоли-ғарбда Литва, ғарбда Польша, шимолда эса Латвия билан чегарадош.
Россия Украинада 24 февралдан буён махсус операция олиб бормоқда. Лукашенко Беларусь низода қатнашмаётганини ва қатнашишни режалаштирмаётганини бир неча марта таъкидлаган. «Тағин мени қандайдир ҳужумни режалаштиряпти, Украинани Беларусь ҳудудидан бомбардимон қилмоқчи деб ўйламанг. Сизнинг ва менинг фарзандларимиз жанг қилишини ҳеч ҳам истамайман. Улар нимани деб жанг қилиши керак?» — деган эди у августда.
Изоҳ (0)